Tau Israel seng nẹ̌tanạ su padang belantara karěngụe maraning 40 su taunge. I sire seng nakakala lawọ soa. Bọu ene, i sire někoạ kemah su Moab, sěmběkang daki bọu Sal᷊ụ u Yordan. Seng mal᷊ighạ i sire sumuẹ̌ sarang Ěntanang Pẹ̌dariandi. I Balak, datung Moab matakụ něgěrine sarung pul᷊ahongu tau Israel. Hakị u ene, i sie nẹ̌kui sěngkatau esẹ arenge Bileam sarang Moab gunang měngutukẹ̌ tau Israel.

Katewe Yehuwa naul᷊ị si Bileam, ’I kau tawe wotonge měngutukẹ̌ tau Israel.’ Hakị u ene, i Bileam madiri matamai. Datu Balak saụ nẹ̌kui si sie kụ nẹ̌diandi sarung měgělị apa ikẹ̌kapulung i Bileam. Katewe i Bileam tatapẹ̌ madiri. Bọu ene Mawu naul᷊ị, ’I kau botonge matamai, katewe i kau kětạeng botonge maul᷊ị apa sarung Takụ paul᷊ịkang.’

I Bileam simake keledai kụ nakoạ sarang Moab. I sie tatapẹ̌ měngutukẹ̌ tau Israel, maning seng nisěding i Yehuwa. Su ral᷊eng, malaekati Yehuwa nẹ̌těngkatodẹ tělung sul᷊ẹ. I Bileam tawe nakasilo malaekatẹ̌ ene, katewe kělědaine nakasilo. Humotong, keledai ene nělenga bọu ral᷊eng kụ simuẹ̌ su baelẹ̌. Bọu ene, keledai ene nẹ̌těngkarěkạ su pagarẹ̌ bọu watu kụ laedi Bileam nahepesẹ̌. Samurine, keledai ene seng madiri dumal᷊eng kụ dimarěmạ. I Bileam něměbahẹ̌ keledai ene dingangu těking.

Su apang seng niwěbahẹ̌ katěl᷊ung sul᷊ẹe, Yehuwa někoạ keledai ene nẹ̌bisara. Keledai ene nẹ̌kiwal᷊o si Bileam, ’Kawe i Tuang turusẹ̌ měmẹ̌měbahẹ̌ si siạ?’ Bileam nẹ̌bera, ’Ual᷊ingu i kau, iạ nakoạ kere taumata wodokẹ̌. Manga si siạ piạ peda, i kau seng taku nipate.’ Keledai ene naul᷊ị, ’Seng taunge i Tuang simake si siạ. Apa iạ bọu někoạ kere ini si Tuang?’

Bọu ene, Yehuwa někoạ i Bileam nakasilo malaekatẹ̌ ene. Malaekatẹ̌ ene naul᷊ị, ’Yehuwa seng nẹ̌sěding si kau měngutukẹ̌ tau Israel.’ Bileam naul᷊ị, ’Iạ nẹ̌sal᷊a. Iạ seng mapul᷊ẹ.’ Katewe malaekatẹ̌ ene  nẹ̌bera, ’I kau botonge makoạ sarang Moab, katewe i kau kětạeng botonge maul᷊ị apa niwerang i Yehuwa.’

Apa i Bileam timuhụ parenta ene? Tala. I Bileam tělung sul᷊ẹ něnal᷊ukạ měngutukẹ̌ tau Israel. Katewe, Yehuwa někoạ i Bileam něngal᷊amatẹ̌ tau Israel. Samurine, tau Israel nẹ̌pěrang dingangu tau Moab, kụ i Bileam nipate. Manga dongkeng humotong i Bileam dimaringihẹ̌ si Yehuwa, hasile tantu limembong mapaelẹ̌.