Ema Izraél iha rai-fuik besik tinan 40. Sira manán ona sidade barak. Agora sira toʼo iha rai-tetuk Moab, parte leste husi Mota Jordaun. Sira besik ona atu tama ba rai neʼebé Maromak promete. Liurai Moab naran Balak taʼuk ema Izraél atu hadau ninia rai. Tan neʼe, nia bolu mane ida naran Balám atu fó-malisan ba ema Izraél.

Maibé Jeová dehan ba Balám: ‘Ó labele fó-malisan ba ema Izraél.’ Tan neʼe Balám la bá. Liurai Balak bolu fali Balám no promete atu fó buat naran deʼit neʼebé nia hakarak. Maibé Balám lakohi nafatin. Tuirmai Jeová dehan: ‘Ó bele bá, maibé ó tenke koʼalia deʼit buat neʼebé haʼu haruka ó atu koʼalia.’

Balám saʼe ninia kuda-burru no bá Moab. Ninia planu mak atu fó-malisan ba ema Izraél maski Jeová bandu ona. Tan neʼe iha dalan, Jeová nia anju mosu dala tolu. Balám labele haree anju neʼe, maibé ninia kuda-burru bele. Foufoun, kuda-burru neʼe laʼo sai husi dalan hodi bá rai-luan. Tuirmai, kuda-burru neʼe sena an ba moru, no habit Balám nia ain ba moru. Ikusliu, kuda-burru neʼe latan an iha dalan klaran. Kuandu kuda-burru halo buat sira-neʼe, Balám sempre baku nia ho ai-tonka.

Ikusmai, Jeová halo kuda-burru bele koʼalia. Kuda-burru neʼe husu ba Balám: ‘Tanbasá mak ó baku hela deʼit haʼu?’ Balám dehan: ‘Ó hamoe haʼu. Se haʼu iha surik karik, haʼu sei oho tiha ó.’ Kuda-burru dehan: ‘Ó saʼe haʼu ba tinan barak ona. Uluk haʼu halo hanesan neʼe ba ó ka lae?’

Tuirmai Jeová halo Balám bele haree anju neʼebé hamriik iha dalan. Anju dehan ba Balám: ‘Jeová haruka ona ó labele fó-malisan ba Izraél.’ Balám dehan: ‘Haʼu mak sala. Haʼu sei  fila fali ba uma.’ Maibé anju dehan: ‘Ó bele bá Moab, maibé koʼalia deʼit buat neʼebé Jeová haruka ó atu koʼalia.’

Balám halo tuir ka lae? Lae. Toʼo tiha Moab, nia koko atu fó-malisan ba Izraél dala tolu, maibé Jeová halo nia fó fali bensaun ba Izraél. Ikusmai, ema Izraél ataka Moab, no Balám mate. Se foufoun Balám halo tuir kedas Jeová, neʼe sei la akontese, loos ka lae?