Ayisraele anguja muchipululu kwa vyaka pafupifupi 40. Yiwu anguthereska matawuni nganandi ngo ngenga ngakukho. Sonu anguzenga mahema ngawu mumadambu nga Moabu kuvuma kwa Musinji wa Yordane. Iyi yenga nyengu yakuti asere mu Charu Chakulayizgika. Balaki yo wenga fumu ya ku Moabu wanguchita mantha kuti amulondengi charu chaki. Mwaviyo, wangudana Balamu kuti wazi ku Moabu kuzitemba Ayisraele.

Kweni Yehova wangukambiya Balamu kuti: ‘Ungaŵatembanga cha Ayisraele.’ Mwaviyo, Balamu wangukana kuluta. Fumu Balaki yingumudana so kachiŵi ndipu yingumulayizga kuti yimupasengi chechosi cho wakhumba. Kweni Balamu wangukana mbwenu. Pavuli paki Chiuta wangukamba kuti: ‘Ungaluta kweni ukakambi vo ini ndakukukambiya pe.’

Balamu wangukwera pa Bulu waki ndipu wangwamba ulendu wakuluta kumwera kwa Moabu. Iyu wanguŵanaŵana kuti wakatembi Ayisraele, chinanga kuti Yehova wangumukambiya kuti wangachiŵatembanga cha. Mungelu waku Yehova wanguma panthowa maulendu ngatatu. Balamu wamuwonanga cha mungelu yo kweni bulu waki wamuwonanga. Pakwamba, bulu wangutuwamu mumsewu ndipu wanguluta mumunda. Pavuli paki, bulu yo wangujipumisa kuchimati cha mya ndipu Balamu wangupumisa lundi laki kuchimati cho. Pakumaliya, bulu yo wangugona pasi pakati pa msewu. Nyengu yeyosi yo bulu uyu wachitanga venivi, Balamu wamupumanga ndi nthonga yaki.

Balamu wati wapuma bulu yo kachitatu, Yehova wanguchitisa kuti walongoro. Bulu wangufumba Balamu kuti: ‘Ntchifukwa wuli ulutiriza kundipuma?’ Balamu wanguti: ‘Wandichitisa kuti ndiwoneki nge muzeleza. Asani ndenga ndi lipanga mphanyi ndakubaya.’ Bulu wangukamba kuti: ‘Ndayenda nawi kwa vyaka vinandi. Kumbi ndikukuchitiyapu viyo?’

Pavuli paki, Yehova wanguchitisa kuti Balamu wawoni mungelu. Mungelu wangukamba kuti: ‘Yehova wangukutcheŵesa kuti ungachitembanga Ayisraele cha.’ Balamu wanguti: ‘Ndananga. Ndiweliyengi kunyumba  kwangu.’ Mungelu wangumukambiya kuti: ‘Ungaluta ku Moabu kweni ukakambi vo Yehova wakukukambiya pe.’

Kumbi Balamu wangusambirapu kanthu? Awa. Ivi vati vachitika, Balamu wangwesa kutemba Ayisraele maulendu ngatatu, kweni pa maulendu ngosi yanga, Yehova wanguchitisa kuti waŵatumbiki. Pavuli paki, Ayisraele anguyukiya Moabu ndipu Balamu wangubayika. Kumbi uwona kuti vatingi viŵengi umampha cha, asani Balamu wanguvwiya Yehova?