Ja israʼelenyo ojxta elyujile 40 jabʼil teye ja bʼa takin kʼinal. Sbʼajintakan jitsan chonabʼik jel chapane. Ja wego tixa aye bʼa lajan kʼinal bʼa chonabʼ Moab, bʼa skʼaxil ja yok jaʼ Jordán, ojxta ochuke ja bʼa Luʼum Kʼapubʼal. Ja mandaranum bʼa Moab, ja Balac, wani xiwel oj japjukyi ja sluʼum yuja israʼelenyoʼiki. Ja yuj skʼanayi jun winik sbʼiʼil Balaam bʼa awajuk bʼa Moab bʼa stajel tiʼal malo ja israʼelenyo, wa xkʼan alxuk, skʼanjel tsats lek bʼa ay jas oj ekʼ sbʼaje bʼa mi lekuk.

Pe ja Jyoba yalyabʼ ja Balaam: «Moka taʼ tiʼal malo ja israʼelenyo». Ja yuj ja Balaam mi waj ja bʼa Moab. Ja Balac sloko bʼa xchabʼil ekʼele sok skʼapayi yajelyi chikan jasa. Pe ja Balaam cha mi waji. Anto ja Dyos yalyabʼ: «Ojni bʼobʼ wajan. Pe kechan oja wal ja jas oj kalawabʼi».

Ja Balaam kʼe ja bʼa snan burra sok waj man Moab. Wani skʼana stajel tiʼal malo ja israʼelenyo, anima alubʼalyabʼ yuja Jyoba mok skʼuluk. Anto ja yanjel ja Jyoba waj tekʼan ja bʼa bʼej oxe ekʼele. Ja Balaam mi yila ja anjeli, pe ja snan burra yila. Bʼajtan, ja snan burra ti xchʼika sbʼaj bʼa yoj jobʼ. Xchabʼil, jel kʼubʼan ekʼ bʼa jun tsʼakabʼ sok latsʼjikan ja yok ja Balaam. Sok yoxil, ti koʼ wukʼan bʼa snalan ja bʼeji. Spetsanil ekʼele, ja Balaam smakʼa sok jun teʼ.

Jaxa bʼa yoxil ekʼele, ja Jyoba yaʼakan akʼumanuk ja snan burra. Sjobʼoyi ja Balaam: «¿Jas yuj waxa makʼawoni?». Ja Balaam sjakʼa: «Yujni lajansok mi xnaʼa kʼinal xa wila. Lek ayukxta jun kespada, ojni jmila». Ja snan burra yala: «Jitsanxa jabʼil wa xkuchuwa ekʼe. ¿Ay maʼ bʼa jkʼulunejawi jachuka?».

Jaxa Jyoba yaʼakan ja Balaam ayil ja anjeli. Ja anjeli yala: «Ja Jyoba yalawabʼ mok waja taʼ tiʼal malo ja Israel». Ja Balaam sjakʼa: «Mini lek ja jas jkʼulani. Ojni kumxukon bʼa jnaj». Pe ja anjeli yala: «Oj bʼobʼ wajan ja bʼa Moab, pe kechan oja wal ja jas oj yalawabʼ ja Dyosi».

 ¿Ay maʼ jas snebʼa ja Balaam yuja jas ekʼ sbʼaji? Miyuk, yujni tsaʼan sleʼa modo oxe ekʼele stajel tiʼal malo ja Israel. Pe yoxil ekʼele ja Jyoba yaʼakan bʼa ayal akoʼ slekilale sok mi bʼa stajel tiʼal malo. Masan ja israʼelenyo tiroʼaniye soka Moab, sok cham ja Balaam. ¿Mi maʼ masni lek oj wajyuj ja Balaam lek skisukxta ja Jyoba?