Ol Israel i stap long ples drai nating klostu 40 yia. Ol i bin pait na daunim planti strongpela siti. Nau ol i wokim kem long veli bilong Moap long hap is bilong Wara Jordan, em taim bilong go insait long Graun Bilong Promis. Balak, king bilong Moap, i pret olsem ol Israel bai kisim graun bilong em. So em i singautim wanpela man nem bilong em Balam, long kam long Moap na tokaut olsem samting nogut i mas painim ol Israel.

Tasol Jehova i tokim Balam: ‘Yu no ken tokaut long samting nogut i mas painim ol Israel.’ So Balam i no laik go. King Balak i singautim em namba tu taim na promis long givim ol samting em i laikim. Tasol Balam i no laik go. Bihain God i tok: ‘Yu ken go, tasol samting mi tokim yu long en, em tasol yu mas tokim ol.’

Balam i kalap long donki na i go long hap saut bilong Moap. Em i tingting long tokaut long samting nogut i mas painim ol Israel, maski Jehova i tokim em long no ken mekim. Tripela taim ensel bilong Jehova i sanap long rot. Balam i no inap lukim ensel, tasol donki bilong Balam i lukim. Fes, donki i lusim rot na go insait long wanpela gaden. Bihain, donki i muv i go pas long banis ston, na lek bilong Balam i bamim banis. Na long namba tri taim, donki i slip i go daun namel long rot. Long dispela tripela taim, Balam i paitim donki long stik.

Bihain long namba tri taim, Jehova i mekim donki i toktok. Donki i askim Balam: ‘Wai na yu wok long paitim mi?’ Balam i tok: ‘Yu mekim mi kamap olsem longlong man. Sapos mi holim bainat mi inap kilim yu.’ Donki i tok: ‘Yu bin sindaun antap long mi inap planti yia. Bipo mi bin mekim kain pasin long yu?’

Na Jehova i opim ai bilong Balam na em i lukim ensel. Ensel i tok: ‘Jehova i bin tokim yu long no ken tokaut long samting nogut i mas painim ol Israel.’ Balam i tok: ‘Mi mekim sin pinis. Mi bai go  bek long ples.’ Tasol ensel i tok: ‘Yu ken go long Moap, tasol samting Jehova i tokim yu long en, em tasol yu mas tokim ol.’

Yu ting Balam i kisim skul long dispela? Nogat. Bihain long dispela, tripela taim Balam i tokaut long samting nogut i mas painim ol Israel, tasol Jehova i mekim na long olgeta wan wan taim em i blesim ol. Bihain ol Israel i pait long ol Moap, na kilim Balam. Yu ting gutpela samting bai kamap sapos Balam i bin harim tok bilong Jehova long fes taim?