Abaisareri bakaikara omu irungu kumara emyaka 40. Bakasingura embuga nyingi ez’amaani. Bakaba batiire enkambi zaabo ha byeya bya Moabu haihi n’Ekyambu Yorudani habwokuba bakaba bali haihi kutaaha omu nsi ey’ekaba ebaraganiziibwe. Omukama wa Moabu arukwetwa Baraka, akatiina ngu Abaisareri bakaba nibagenda kutwara ensi ye. Nahabweki, aketa omusaija arukwetwa Baramu kwija Moabu nukwo akyene Abaisareri.

Baitu Yahwe akagambira Baramu ati: ‘Tosemeriire kukyena Abaisareri.’ Nahabweki, Baramu akanga kugenda. Omukama Baraka akamweta omurundi ogw’akabiri kandi yamuraganiza kumuha kyona eky’arukugonza. Baitu nabwo, Baramu akanga. Ruhanga yamugambira ati: ‘Nosobora kugenda, baitu ekigambo ekindakugambira nikyo orabaza.’

Baramu akatemba enkaina ye yagenda Moabu. Akaba ayetekaniize kukyena Abaisareri, kandi kunu Yahwe akaba amutangire. Maraika wa Yahwe akamweyoleka emirundi esatu omu muhanda. Baramu akaba atakumurora baitu enkaina ye ekamurora. Omurundi ogw’okubanza, enkaina ekaruga omu muhanda yagenda omu kisaka. Hanyuma, enkaina ekemigiriza ha rugo rw’amabaale, yamigira ekigere kya Baramu ha rugo. Hakumalirra enkaina ekabyama hagati y’orugudo. Buli murundi obu yayangaga, Baramu yagiteraga n’omwigo.

Ha murundi ogwa kasatu, Yahwe akasobozesa enkaina kubaza. Enkaina ekakaguza Baramu eti: ‘Nonterra ki?’ Baramu akagigarukamu ati: ‘Onfoire mudomadoma. Nakukwisire kakuba mbaire nyine empirima.’ Enkaina emugambira eti: ‘Onvugire kumara emyaka nyingi. Ndalengereho kukujemera?’

Aho nubwo Yahwe yaigwire amaiso ga Baramu kurora maraika. Maraika akamugambira ati: ‘Yahwe akutangire kukyena Abaisareri.’ Baramu akamugarukamu ati: ‘Nsobeze. Leka ngarukeyo omu ka.’  Baitu maraika akamugambira ati: ‘Nosobora kugenda Moabu, baitu obaze ebigambo Yahwe ebyarakukugambira byonka.’

Baitu Baramu akegera ha nsobi ye? Nangwa. Hanyuma y’ebi byona, Baramu akongera yalengaho kukyena Abaisareri emirundi esatu, baitu buli murundi Yahwe yamuleteraga kubaha omugisa omu kiikaro ky’omukyeno. Isareri ekamalirra erwanisize Moabu, kandi Baramu yaitwa. Tikyakubaire kirungi kakuba Baramu yayorobiire Yahwe?