Израильчилер ээн кургаг ховуга 40 хире чыл чоруп келген. Олар хөй хоорайларны эжелеп алган. Ам олар Моавтың ховуларынга, Иордан хемниң чөөн талазынга, турлагжып алган. Иегованың оларга аазаан черинче кирер үе келген. Моавтың хааны Валак израильчилер ооң черин хунаап апаарындан коргуп турган. Ынчангаш ол израильчилерни каргаар кылдыр, Валаам дээр кижини Моавче чалаан.

Ынчалза-даа Иегова Валаамга: «Израильчилерни каргава» — деп чугаалаан. Ынчангаш Валаам ынаар барбаан. Валак хаан Валаамга күзээн-не чүүлүн бээрин аазааш, ийи дугаар база кыйгырган. Валаам база-ла ынаваан. Ынчан Бурган аңаа: «Ынаар барып болур сен, чүгле мээң айыткан чүүлүмнү чугаалаар сен» — дээн.

Валаам элчигенинге олурупкаш, Моавче чорупкан. Иегова израильчилерни каргавас сен деп чугаалаарга-даа, Валаам каргаар дээш бар чыткан. Иегованың ангели ооң оруун үш катап доскан. Валаам ол ангелди көрбээн, а ооң элчигени көрүп каан. Ангел көстүп кээрге, элчиген шөлче ээпкен. Ийи дугаарында элчиген даш херимге чыпшыр турупкаш, Валаамның будун кызыпкан. А үш дугаарында ол черге чыдып алган. Элчигени дедирленирге-ле, Валаам ону ыяш-биле соп турган.

Иегова элчигенни ам-на чугааландырыпкан. Ол Валаамдан айтырган: «Мени чүге эттеп тур сен?» Валаам аңаа: «Сен дээш мен аамай кижи ышкаш көстүп тур мен. Хылыжым турган болза, сени өлүрүп каар ийик мен!» — дээн. Элчигени аңаа чугаалаан: «Сен мени шагдан бээр мунуп келдиң. Ооң мурнунда ынчаар алдынып турган ийик мен бе?»

Ынчан Иегова Валаамга ангелди көргүзүпкен. Ангел аңаа мынча дээн: «Иегова сеңээ израильчилерни каргава диди чоп». Валаам аңаа: «Ийе, шын эвес кылдым, ынчангаш дедир чанайн» — деп  харыылаан. Ынчалза-даа ангел: «Моавче барып болур сен. Ынчалза-даа чүгле Иегованың айыткан чүүлүн чугаалаар сен» — дээн.

Валаамга ол өөредиг болган бе? Чок. Ооң соонда Валаам Израильди үш катап каргаан. Ынчалза-даа Иегова ооң каргыштарын йөрээл кылдыр кылыпкан. Түңнелинде израильчилер Моавты эжелеп алгаш, Валаамны өлүрүп каан. Валаам эгезинден тура Иегованы дыңнаан болза, дириг артар ийик.