Te israeletik jteb ma sta 40 jaʼbil te ayikix ta jochol takin kʼinal. Yuʼuntayojikix bayal mukʼul lumetik-a te ay yipike. Jich yuʼun ayik ta spamlej yuʼun te nasion Moab, ta slokʼib kʼajkʼal yuʼun te mukʼul jaʼ Jordán sok nopol ya x-ochikix ta Kʼinal te Albil skʼoplal ya yichʼike. Te Balac ajwalil yuʼun Moab, ay ta xiwel yuʼun ya skuy te ya xpojbot skʼinal yuʼun te israeletike. Jich yuʼun la skʼanbey jtul winik te Balaam sbiil te yakuk xbajtʼ ta Moab ta sbolobtesbeyel skʼoplal te israeletik o te ya yal ta tulan te ay bin chopol ya xkʼot ta pasel ta stojolike.

Pero te Jehová la yalbey te Balaam: “Mame xa abolobtesbey skʼoplal te israeletike”. Jich yuʼun te Balaam ma la skʼan bajtʼ ta Moab. Te ajwalil Balac la yikʼ ta schebal buelta sok jamal la yalbey te ya yakʼbey te bin ya skʼane, pero te Balaam la spʼaj te ikʼele. Jich yuʼun te Dios la yalbey: “Ya kakʼbat permiso te ya xbaate. Jaʼnax yuʼun te jaʼ ya awalbey skʼoplal te bin ya kalbate”.

Te Balaam bajtʼ sok te meʼ burro yuʼun ta sur yuʼun Moab. Te bin snopoj ta yoʼtan ya spase, jaʼ te ya sbolobtesbey skʼoplal te israeletik, manchukme albot yuʼun Jehová te ma jichuk ya spase. Jich yuʼun te chʼul-abat yuʼun te Jehová oxeb buelta la yakʼ sba ta ilel ta be. Te Balaam ma la yil te chʼul-abate, pero te meʼ burro yuʼun la yil stukel. Ta sbabial te meʼ burro la sjel sbe och bael ta yan kʼinal. Ta patil te meʼ burro noptsaj bael ta jun tsʼajkʼ te pasbil ta tonetik tey kaj stenbey yok-a te Balaam. Ta slajibal te meʼ burro la spajkan sba ta olil be. Te jayeb buelta jich la spas-abi, te Balaam la smaj ta teʼ te meʼ burroe.

Ta patil, te Jehová la yakʼ kʼopojuk te meʼ burro. Te meʼ burro la sjojkʼoybey te Balaam: “¿Bin yuʼun te ya amajone?”. Te Balaam jich la sut: “Yuʼun ya awakʼon ta kʼexlal. ¡Te ayuk espada ta jkʼabe, ya jmilat te jichuke!”. Te meʼ burro la yalbey: “Bayalix jaʼbil ya akajtijibinon. ¿Aybal jich jpasojbat ini?”.

Jich yuʼun te Jehová la yakʼ te yakuk yil te chʼul-abat te Balaam. Te chʼul-abat la yalbey: “Te Jehová ya sjultesbat ta awoʼtan te maba ya xbaat ta sbolobtesbeyel skʼoplal te israeletik”. Te Balaam jich la sut: “La jta  jmul. Ya sujton bael ta jna”. Pero te chʼul-abat, jich la sutbey: “Ya xjuʼ xbaat ta Moab, jaʼnax yuʼun jaʼ ya awalbey skʼoplal te bin ya yalbat te Diose”.

¿Yabal akuy te ay bin la snop yuʼun te Balaame? Maʼuk, melel oxebxan buelta kʼan sbolobtesbeyel skʼoplal te israeletike. Pero te oxeb buelta jich la spase, te Jehová la yakʼbey ta yoʼtan yalel utsilkʼopetik ma jaʼuk te sbolobtesbeyel skʼoplal te israeletik. Ta slajibal, te israeletik la yochintayik te Moab, jich laj te Balaam. Jaʼ kʼax lek te lajuk yichʼ ta wenta te bin albot yuʼun Jehová ta sjajchibale, ¿mabal jichuk?