Haros 40 ka tuig na an mga Israelita ha kamingawan. Damu na nga dagku nga syudad an ira napirde. Yana, samtang nagkakampo hira ha kapatagan han Moab ha este han Salog Jordan, panahon na nga sumulod hira ha Tuna nga Iginsaad. Hi Balak, an hadi han Moab, nahadlok nga masakop han mga Israelita an iya tuna. Salit iya gin-imbitar an usa nga lalaki nga an ngaran Balaam nga kumadto ha Moab basi isumpa an mga Israelita.

Pero ginsidngan ni Jehova hi Balaam: ‘Ayaw isumpa an mga Israelita.’ Salit waray kumadto hi Balaam. Gin-imbitar utro hiya ni Hadi Balak ngan nagsaad nga ihahatag ha iya an bisan ano nga iya karuyag. Pero dumiri la gihap hiya. Katapos, an Dios nagsiring: ‘Puydi ka kumadto, pero an imo la iyayakan an akon isisiring ha imo.’

Hi Balaam sinakay ha iya asno ngan nagbiyahe tipasur ngadto ha Moab. Nagplano hiya nga isumpa an mga Israelita, bisan kon gindid-an hiya ni Jehova. An anghel ni Jehova nagpakita ha dalan hin tulo ka beses. Diri nakikita ni Balaam an anghel, pero nakikita ito han iya asno. Han siyahan nga nagpakita an anghel, an asno sumimang ha dalan ngan nagtipakadto ha usa nga uma. Ha ikaduha, sumuksok ito ha usa nga pader, salit naipit an tiil ni Balaam. Ngan ha ikatulo, linuob ito ha butnga han dalan. Ha tagsa hito nga higayon, ginlalatob ni Balaam an asno.

Ha ikatulo nga pagpakita han anghel, ginpayakan ni Jehova an asno. Nagpakiana ito kan Balaam: ‘Kay ano nga ginlilinatob mo ako?’ Hi Balaam binaton: ‘Gintitinuyawan mo la ako. Kon may espada ako, papatayon ko ikaw.’ An asno nagsiring: ‘Damu na ka tuig nga nagsisinakay ka ha akon. Gintratar ko na ba ikaw hin sugad hini hadto?’

Katapos, gintugotan ni Jehova nga makita ni Balaam an anghel. An anghel nagsiring: ‘Ginsidngan ka ni Jehova nga diri isumpa an Israel.’ Hi Balaam nagsiring: ‘Sayop an akon ginbuhat. Mauli na ako.’ Pero an  anghel nagsiring: ‘Puydi ka kumadto ha Moab, pero an imo la iyayakan an isisiring ha imo ni Jehova.’

Nahibaro ba hin leksyon hi Balaam? Waray. Iya la gihap ginsarihan nga isumpa an Israel hin tulo ka beses, pero ha tagsa hito, ginpahinabo ni Jehova nga bendisyon lugod an mayakan ni Balaam. Ha urhi, ginsulong han mga Israelita an Moab, ngan namatay hi Balaam. Diri ba maopay unta kon ha tinikangan pa la namati na hi Balaam kan Jehova?