Efa kadiriny 40 taon̈o Israelita aby io tamy tany paiky tan̈y. Maro be tanàna resindro, ndray lakorony tanàna aby io fatatra mare. Iro amy zay nitoby tankiakany Moaba, tantin̈ianany Ten̈aranony Jordana, ke efa handeha hiditry amy Tany Nampan̈antinain̈y. Navozo mare Balaka panjakany Moaba, tsao tanindro jiaby ho losony Israelita. Ke izy nan̈iraka lelahy araiky, Balama an̈aranizio, handeha han̈ozon̈o Israelita.

Fa Jehovah nan̈ambara Balama: ‘Anao tsy mahazo man̈ozon̈o Israelita.’ Ke Balama tsy nandeha tan̈y. Fa Panjaka Balaka mbala nikaiky izy fan̈ondroeny, baka io nampan̈anten̈a han̈amia izy zay raha tadiaviny. Balama mbala tsy nety fo. Zan̈ahary amy zay nivolan̈a taminany: ‘Mindao anao, kanefa zay raha ambarako anao fo volàn̈a.’

Nitenginy borikinany Balama, ke nan̈atsimo nandeha ta Moaba. Izy mbala tihan̈ozon̈o Israelita aby io fo, ndray izy fa tsy nimboany Jehovah han̈ano zen̈y. Intelo, anjeliny Jehovah nisakana lalan̈a. Fa tsy hitany Balama. Boriky io ndraiky nahita zen̈y. Tamy voanalohany, nivily tan̈aty saha boriky io. Izy baka tio nifify tamy lampimbato be. Ke tery tamizio vitiny Balama. Tamy farany, nandry be tan̈ivondalan̈a tio izy. Nivangovangoany Balama kobay raha io tamy zen̈y.

Nataony Jehovah nahay nivolan̈a boriky io baka tio. Izy nan̈ontany Balama karaha ty: ‘Nan̈ino ma zaho vangovangoenao karaha io?’ Balama nivolan̈a: ‘Anao mankadala zaho. Koa nisy meso taminaka anao fa nivoneko.’ Boriky io nivolan̈a: ‘Efa taon̈o maro anao nitenginy zaho. Zaho ma efa nan̈ano anao karaha ty?’

Nataony Jehovah hitany Balama amy zay anjely io. Izio nivolan̈a: ‘Anao efa nivolan̈iny Jehovah tsy mahazo man̈azon̈o Israely.’ Balama nivolan̈a: ‘Tsy nety raha nataoko. Zaho io efa handeha  himpody.’ Fa anjely io nivolan̈a: ‘Anao mindao a Moaba. Fa raha ambarany Jehovah anao fo volàn̈a.’

Mba nitandrin̈esany Balama edy ma raha zen̈y? Ehe, tsy nitandrin̈esany. Ndray izy aby mbala nan̈ozon̈o Israely aby io intelo, fa izy fo nivoany Jehovah tsodrano. Tafara tatỳ, Israelita aby io nanafiky Moaba, ke naty Balama. Tsy naty Balama hotrizay izikoa izy nan̈araka volan̈a Jehovah!