Ayisalayeli ŵaŵele m’cipululu kwa yaka yakupunda 40. Jemanjaji ŵaŵele ali mkugomeka misinda jamacili. Sambano jemanjaji ŵayice m’yiŵata ya ku Mowabu cakungopoko lyuŵa kwa Lusulo lwa Yolodani. Jeleji jaliji ndaŵi jakuti ajinjile mu Cilambo Cacilanga. Balaki, juŵaliji mwenye jwacilambo ca Mowabu ŵajogopaga kuti jemanjaji camsumule cilambo cakwe. M’yoyo jwam’ŵilasile Balamu kuti ayice ku Mowabu kukwalwesya Ayisalayeli.

Nambo Yehofa ŵamsalile Balamu kuti, ‘Mkasimwalwesya Ayisalayeli.’ M’yoyo Balamu ŵakanile kwawulako. Nambo mwenye Balaki jwam’ŵilasilesoni, ni ŵamsalile kuti campe cilicose campaka asace. Nambope Balamu ŵakanilesoni. Kaneko Mlungu ŵamsalile kuti, ‘Komboleka kwawula, nambo mkagambe kuŵeceta maloŵe gacinjimsalilapego.’

M’yoyo Balamu ŵakwesile bulu jwakwe nikuwutanda ulendo wakwawula ku Mowabu. Jwalakwe jwasakaga kuti akalwesye Ayisalayeli atamose kuti Yehofa ŵamsalile kuti akaja kutenda yeleyo. Ali mkwawula, lilayika lya Yehofa lyawonecele katatu mumsewo waŵajendagawo. Balamu nganaliwona lilayikalyo, nambo bulu juŵakwesilejo ŵaliwonaga. Candanda bulujo jwasepucile kwitinji. Kaneko jwalikanganicisye kwipupa lya maganga yalumo ni lusajo lwa Balamu. Pambesi pakwe, jwagonile pasikati pamsewo. Kwandaŵi josopeji, Balamu ŵamputaga bulujo ni ndodo.

Nambo lilayikalyo lili liwonecele ulendo watatu, Yehofa ŵatendekasisye kuti bulujo aŵecete. Ni ŵam’wusisye Balamu kuti, ‘Ana ligongo cici mkumbuta?’ jwalakwe jwajanjile kuti, ‘Ligongo mundoŵesye. Ngakole upanga ngam’wuleje.’ Ni bulujo jwatite, ‘M’ŵele mlikungwela kwa yaka yosopeyi. Ana pakwete pindesile yeleyi?’

Kaneko Yehofa jwatendekasisye kuti Balamu aliwone lilayika lila. Lilayikalyo lyatite, ‘Yehofa ŵamkalamwisye kuti mkaja kwalwesya Ayisalayeli.’ Balamu ŵajanjile kuti, ‘Ndemwisye. Cimbujile kunyumba.’ Nambo lilayika lila lyatite, ‘komboleka kwawula ku Mowabu, nambo mkagambe kuŵeceta yacakamsalile Yehofa.’

 Ana Balamu ŵalijiganyisye cilicose? Iyayi. Yeleyi yili yitendekwe, Balamu ŵalinjile kwalwesya Ayisalayeli katatu, nambo ndaŵi jilijose, Yehofa ŵatendekasyaga kuti malwesyogo gaŵe majali. Kaneko Ayisalayeli ŵagomece cilambo ca Mowabu ni Balamu ŵam’wuleje. Ana Balamu akampikanile Yehofa yeleyi yikatendekwe?