Le tsʼoʼok óoliʼ 40 años joʼopʼok u máan le israelitaʼob teʼ desiertooʼ jeʼeloʼob tu táax luʼumil Moab, tuláakʼ juntséel le río Jordanoʼ. Letiʼobeʼ tsʼoʼok kaʼach u ganartikoʼob yaʼab nukuch kaajoʼob yéetel maʼ yaʼab u bin u yokloʼob teʼ Luʼum Aʼalaʼan u Tsʼaʼabaltiʼoboʼ. Balak, u reyil Moabeʼ, sajak kaʼach ka luʼsaʼak u luʼumoʼob tumen le israelitaʼoboʼ. Le oʼolal tu yaʼalaj tiʼ juntúul máak ku kʼaabaʼtik Balaam ka xiʼik Moab utiaʼal ka u maldecirt le israelitaʼoboʼ. Lelaʼ u kʼáat u yaʼaleʼ yaan u kʼaʼam aʼalik ku tsʼíiboltik ka úuchuk baʼax kʼaas tiʼob.

Chéen baʼaleʼ Jéeobaeʼ tu yaʼalaj tiʼ Balaam: ‹Maʼ unaj a maldecirtik le israelitaʼoboʼ›. Le oʼolal Balaameʼ maʼ tu yóotaj bin Moabiʼ. Le rey Balakoʼ tu kaʼa aʼalajtiʼ ka xiʼik. Tu yaʼalaj xan jeʼel u tsʼáaiktiʼ jeʼel baʼalak u kʼáateʼ. Chéen baʼaleʼ Balaameʼ maʼ tu yóotaj biniʼ. Dios túuneʼ tu yaʼalajtiʼ: ‹Jeʼel u páajtal a bineʼ. Chéen baʼaleʼ yaan a waʼalik chéen le baʼaxoʼob ken in waʼaltechoʼ›.

Balaam túuneʼ tu natʼaj u x-burraeʼ ka bin Moab. U tukultmaj kaʼach u maldecirtik le israelitaʼob kex aʼalaʼabtiʼ tumen Jéeoba maʼ u beetkoʼ. U ángel Jéeoba túuneʼ tu chíikbesuba óoxtéen teʼ bejoʼ. Balaameʼ maʼ tu páajtal u yilik kaʼach le angeloʼ, pero u x-burraeʼ ku páajtal u yilik. Yáaxeʼ le x-burraoʼ jóokʼ tiʼ le bejoʼ ka ook ichil le kʼáaxoʼ. Tuláakʼ juntéeneʼ le x-burraoʼ jach tu takʼuba teʼ kootoʼ ka tu yachʼaj u yook Balaam. Tu tsʼookeʼ le x-burraoʼ chilaj teʼ chúumuk bejoʼ. Tiʼ cada juntéeneʼ, Balaameʼ tu jaʼajatsʼaj le x-burra yéetel u xóolteʼoʼ.

Ka tsʼoʼokeʼ Jéeobaeʼ tu beetaj u tʼaan le x-burraoʼ. Le x-burraoʼ tu yaʼalaj tiʼ Balaam: ‹¿Baʼaxten ka jatsʼiken?›. Balaameʼ tu núukajtiʼ: ‹Tumen chéen táan a burlarkaba tiʼ teen. Wa yaanten kaʼach junpʼéel espadaeʼ bejlaʼa sáam in kíimsecheʼ›. Le x-burra túunoʼ tu núukajtiʼ: ‹Yaʼab años tsʼoʼok a natʼken. ¿Tsʼoʼok wa in yáax beetiktech beyoʼ?›.

Jéeoba túuneʼ tu beetaj u yilaʼal le ángel tumen Balaamoʼ. Le angeloʼ tu yaʼalajtiʼ: ‹¿Maʼ wa tu yaʼalajtech Jéeoba maʼ a bin a maldecirt u kaajil  Israeliʼ?›. Balaam túuneʼ tu núukaj: ‹Tsʼoʼok in kʼebantal. Yaan in suut tin wotoch›. Le angeloʼ tu yaʼalajtiʼ: ‹Jeʼel u páajtal a bin Moabeʼ, pero chéen yaan a waʼalik le baʼax ken u yaʼaltech Diosoʼ›.

A tuklikeʼ, ¿tu beetaj wa Balaam le baʼax aʼalaʼabtiʼ tumen Diosoʼ? Maʼatech, tumen letiʼeʼ óoxtéen tu yóotaj u maldecirt u kaajil Israel. Chéen baʼaleʼ tu yóoxtéenileʼ Jéeobaeʼ tu beetaj u bendecirtik tu lugar u maldecirtik. Tu tsʼookeʼ le israelitaʼoboʼ baʼatelnajoʼob tu contra Moab, ka kíimsaʼab Balaam. ¿Máasaʼ jeʼel u bin kaʼach utsil tiʼ Balaam wa ka u yuʼub u tʼaan Dios desde tu káajbaleʼ?