AYisarere araki ku ngbakungbo yo tipa agarã naambeda kina kuti 40. I azi dungu nyanyaki agbata. Awere, fuo i zi bataya rogo gu kpasakpasarago nga ga Moaba pati gu Di nga Yaradene ku uroyo, si angia regbo fuyo tipa ka rimo ku Ringara Mokido yo. Baraka, nangia bakindo Moaba aagunde nga i nika zio gako ringara azio. Sidu, ko ayambu kumba rimoko angia Birama ko ye ka tiwa aYisaraere.

Ono Yekova aya fu Birama: ‘Ka mo tiwanga aYisaraere ya.’ Birama aká ka ndu. Bakindo Baraka ki yambu ko berewe ni uehe na ki kido ko nga ko nika fu ai guhe ko aidaha. Si ki vura du wo, Birama ki ká aká. Fuani, Mbori ki ya fuko: ‘Mo ima rengba ka ndu, ono mo gumba kina gupai mi nika pehe foro.’

Birama ki di gako dongi ki tona nduge ku Moaba yo. Ko aaida ka tiwa aYisaraere atiwa wa vura duhe nga Yekova aima zako ti ni. Ga Yekova maraika akuru fuko bangiri gene bara biata. Birama aabingo gu maraika re te, ono kina gako dongi naabi ko. Ni bambataha, gu dongi re akpara bangirigene kusayo ki rimi ku rogo ati. Gu dongi re ki gbia tiru berewe na ndugu, ki gbingbida ndu Birama kuti ni. Niyangaraha, gu dongi re api sande bangirigene. Ho dongi aamanga agi apai re ni, Birama anaata ru ata na ngbangbaki.

Fuo gu biata tata ru, Yekova asa gu dongi re u fura. Gu dongi re asana Birama nga: ‘Tipagine mo ata re ti ni?’ Birama ki ya: ‘Mbiko mo nawia re awia. Ka basape nidu bere ka mi ima imo ro.’ Dongi ki ya: ‘Mo ima ora rire tipa dungu agarã. Ya mo mi amangingo ro wa gere mbata?’

Fuani, Yekova azaki bangiri Birama ko bi maraika. Maraika aya: ‘Yekova aima za ro ka mo tiwanga aYisaraere ya.’ Birama ki ya:  ‘Mi ima manga gbegberẽpai. Mi nika karaga tire.’ Ono Maraika ki ya: ‘Mo nduandu ku Moaba ya, ono mo nika gumba kina gupai Yekova nika ya foro mo gumbaha.’

Ya mo Birama awirikipai ti gipai re? Oó. Fuo gure, Birama aˈasadi ka tiwa aYisaraere bara biata, ono kuba tiwa yo, Yekova asako ko fu maku fuyo. Niyangaraha, aYisaraere azubo Moaba na ki imi Birama. Anga wenepai kadu ka Birama adegetuko fu Yekova ti kina tonatonaha te?