Israelitas ma sanéyibu yaaca 40 íz de goló casaayibu ló yoovich né ma bunyibu gan xidal gudxrop. Órni bisaladxyibu ló toib láach ni goyoʼ ló layoo xtuny Moab, ticueʼ guʼuc Jordán, né ma biatz goxeʼsi par ñoʼyibu ló Layoo ni Dios Biduidy xtiitz guicaʼyibu. Rey xtuny Moab ni góc laa Balac, bidzuibybu que israelitas ñax xaliobu. Por ngú gonabbu Balaam ñee Moab par nanabbu lóo Dios que israelitas nasaclóo cós mal.

Per Jehová gochbu Balaam: «Diti non guinablo cós mal par israelitas». Por ngú Balaam diti gosaguelbu ñeebu Moab. Rey Balac bixelcaʼ láabu stoib né gochbu Balaam que saduidybu nitisi guinab Balaam, per Balaam diti gosaguel. Ór cú Dios gochbu Balaam: «Satzeelo. Per nosi guiniʼlo ni gaabi looy».

Balaam goruby xpor né goyee Moab. Goloʼbu guicbu guinabbu cós mal par israelitas ná Jehová góoch láabu diti ñonybu láani. Ór cú ángel xtuny Jehová bireʼ nislóbu tzón buelt. Xporbu bibiʼ ángelcu per Balaam diti bibiʼ láabu. Primer, xporbu goyoʼ lainy guiʼix. Ni rarop buelt, birecueʼmu né bituidymu ñeʼ Balaam cueʼ guiee. Ni rion buelt gotmu layoo. Guionca buelt reʼ Balaam godin láamu né toib yac.

Jehová bunybu que borcu naniʼ. Gonabdiitzmu Balaam: «¿Xigony caguinlo naʼ?». Balaam cuapy láamu: «Portín cuenunysi ronylo naʼ. Pal ñapa toib espad, reʼca nagati looy». Ór cú cuapymu Balaam: «Ma por xidal íz rabubylo naʼ. Né ni toib buelt diti ma buni looy scá».

Ór cú Jehová bixalbu bisaló Balaam par labúu nabiʼbu ángelcu. Ángelcu góoch láabu: «Jehová gochbu looy que diti ñeelo par nanablo cós mal par buñ israelitas». Balaam cuapy: «Bichéya. Guibigueta lidxi». Per ángelcu góoch láabu: «Labúu tzeelo Moab, per nosi guiniʼlo ni Dios gaiby looy».

 Xpensarylo, ¿goyoʼ xcalrrien Balaam la? Yaca, portín después, tzón buelt nábu nanabbu cós mal par israelitas, per guionca bueltcu Jehová buny que nanabbu galnasác par israelitas. Después israelitas cualóyibu gudx Moab né Balaam goity. ¿Más galán narecaa Balaam pal nasobdiitzbu Jehová primerdiguieʼ buelt ja?