I nge telo rok me Icrael pi mwaki mapol, Moses onongo dong cok to. Jehovah owaco bote ni: ‘Pe in aye ibitelo jo Icrael i Lobo ma Kiciko Pire. Ento abiye ni inen lobo-nu.’ Ci Moses olego Jehovah ni oyer ngat ma bileyo ka tyene macalo latela pa jone. Jehovah owaco bote ni: ‘Cit bot Yocwa, ci iwacce ni ayero en.’

Moses owaco bot jo Icrael ni ecok to woko, dok Jehovah oyero Yocwa me telo wigi i Lobo ma Kiciko Pire. Ci Moses owaco bot Yocwa ni: ‘Pe ilwor. Jehovah bikonyi.’ I nge meno, Moses ocito i Wi Got me Nebo, ci Jehovah onyutte lobo ma En ociko me miyone bot Abraim, Icaka, ki Yakobo. Moses oto ma tye ki mwaka 120.

Jehovah owaco bot Yocwa ni: ‘Ngol loka Jordan, wucit wa i lobo Kanaan. Abikonyi kit ma akonyo kwede Moses. Nen ni ikwano Cikka nino ducu. Pe ibed ki lworo. Bed ma cwinyi nwang. Cit itim gin ma aciki me timone.’

Yocwa ooro lurot piny aryo me cito Jeriko. I pwony ma lubo man, wabineno ngo ma otimme kunnu. I kare ma  gudwogo, gukelo ripot ni meno aye kare maber me lweny i kom lobo Kanaan. Orwone, Yocwa owaco bot rok me Icrael ni guyubbe pi wot. Ci en omiyo lulamdog ma gutingo canduk me gicikke gutelo yo kun giciko Kulu Jordan. Kulu onongo opong libyeny wa i wi tera. Ento i kare ma lulamdog guluto tyengi i pii ma i doge-ni litap, ci kulu-ni ojuko mol dok piine odwon woko! Lulamdog guwoto gucung i dye Jordan nio ka rok ducu me Icrael otyeko ngolo loka kuca. Pe itamo ni tango meno opoyo wigi i kom gin ma Jehovah otimo i Nam Makwar?

I nge mwaki mapol i dye tim, jo Icrael guleyo Lobo ma Kiciko Pire. Onongo dong gitwero puro potogi, ki pito poto olok ki nyig yadi mukene. Obedo lobo ma mol cak ki moo kic.