Mose nyɛɛ Israel bi ɔmɛ a hɛ mi jeha babauu. Benɛ e piɛ bɔɔ nɛ e ma gbo ɔ, Yehowa de lɛ ke: ‘Tsa pi mo nɛ o maa ngɔ Israel bi ɔmɛ kɛ ya Si Womi Zugba a nɔ. Se ma ha o maa na zugba a.’ Enɛ ɔ he ɔ, Mose de Yehowa ke e hla nɔ kpa konɛ e nyɛɛ ma a hɛ mi nɛ e hyɛ a nɔ. Yehowa de lɛ ke: ‘Yaa Yoshua ngɔ nɛ o de lɛ ke lɛ nɛ e maa nyɛɛ ma a hɛ mi.’

Mose de ma a tsuo ke e be kɛe nɛ e ma gbo. E ha nɛ a le hu kaa Yoshua ji nɔ nɛ Yehowa hla kaa e nyɛɛ a hɛ mi kɛ ya Si Womi Zugba a nɔ. Lɔ ɔ he ɔ, Mose de Yoshua ke: ‘Koo ye gbeye. Yehowa maa ye bua mo.’ Lɔ ɔ se ɔ, Mose ya kuɔ Nebo Yoku ɔ, nɛ Yehowa ngɔ zugba a nɛ e wo Abraham, kɛ Isak, kɛ Yakɔb si ke e kɛ ma ha mɛ ɔ kɛ tsɔɔ lɛ. Mose ye jeha 120 loko e gbo.

Yehowa de Yoshua ke: ‘Moo po Yɔdan Pa a kɛ ya Kaanan zugba a nɔ. Ma ye bua mo kaa bɔ nɛ i ye bua Mose ɔ. Moo kane ye Mlaa amɛ daa ligbi. Koo ye gbeye. Moo pee kã. Yaa nɛ o ya pee nɔ́ fɛɛ nɔ́ nɛ i de mo ke o pee ɔ.’

 Yoshua tsɔ slaali enyɔ kɛ ho Yɛriko ma a mi ya. Ngɛ yi nɛ nyɛɛ se ɔ mi ɔ, wa maa kase níhi fuu kɛ kɔ nɔ́ nɛ ya nɔ ngɛ lejɛ ɔ he. Benɛ a kpale a se kɛ ba a, a de ma a ke a ma nyɛ ma ya ngɔ Kaanan zugba a. E nɔ jena a, Yoshua de ma a ke a gbɛ a bo tsu ɔmɛ nɛ a dla a he. Kɛkɛ nɛ e ha nɛ osɔfo ɔmɛ nɛ a tlooɔ somi daka a sɛ hlami kɛ ho Yɔdan Pa a nya ya. Jamɛ a be ɔ mi ɔ, pa a hyi. Se benɛ osɔfo ɔmɛ ngɔ a nane kɛ ma nyu ɔ mi pɛ kɛkɛ nɛ nyu ɔ da si, nɛ nyu ɔ tsuo mii! Osɔfo ɔmɛ ya da si ngɛ pa a kpɛti. A da si ngɛ lejɛ ɔ hluu kɛ ya si benɛ ma a tsuo po pa a. Anɛ o susuu we kaa nyakpɛ nɔ́ nɛ ɔ ma ha nɛ a kai nɔ́ nɛ Yehowa pee ha mɛ ngɛ Wo Tsu ɔ he ɔ lo?

Jeha babauu nɛ a kɛ nyɛɛ nga a nɔ ɔ se ɔ, Israel bi ɔmɛ ya su Si Womi Zugba a nɔ. Jehanɛ ɔ lɛɛ, a ma nyɛ maa po wehi kɛ mahi. A ma nyɛ maa pee wai ngmɔhi nɛ́ a du tsohi nɛ woɔ yiblii. Zugba a hu hi, nɛ e baa ní saminya.