Nunga marpulu taon si Musa memimpin halak Israel. Satongkin nai, mate nama ibana. Didok Jahowa ma tu ibana, ‘Ndang ho na mamboan bangso Israel masuk tu Tano na Dijanjihon. Alai boi do idaonmu Tano na Dijanjihon i.’ Dipangido si Musa ma tu Jahowa asa dipillit pemimpin na baru. Dung i didok Jahowa ma tu si Musa, ‘Laho ma ho tu si Josua. Jala dok ma tu ibana, ibana do na Hupillit.’

Dipaboa si Musa ma tu bangso i, laho mate nama ibana. Jala nunga dipillit Jahowa si Josua laho mamimpin bangso Israel tu Tano na Dijanjihon. Didok si Musa ma tu si Josua, ‘Unang ho mabiar. Urupan ni Jahowa do ho.’ Dung i, laho ma si Musa tu Dolok Nebo. Sian i, dipatudu Jahowa ma tu ibana tano na dijanjihon tu si Abraham, si Isak dohot si Jakkob. Marumur 120 taon ma si Musa tingki mate ibana.

Didok Jahowa ma tu si Josua, ‘Sian Sunge Jordan ma hamu lewat laho masuk tu Kanaan. Urupanku do ho, songon Ahu mangurupi si Musa. Jaha ma Patikku ganup ari. Unang ho mabiar. Ingkon barani do ho. Laho ma ho jala ulahon ma parentangki.’

 Disuru si Josua ma dua mata-mata tu kota Jeriko. Di cerita na mangihut, taida ma na masa disi. Dung mulak nasida dipaboa ma, saonari do tingki na pas masuk tu tano Kanaan. Marsogotna i, disuru si Josua ma asa siap-siap halak Israel. Disuru ma angka malim mamboan tabut perjanjian. Nasida ma na parjolo laho tu Sunge Jordan. Balga do aek di sunge i. Alai, dung masuk pat ni nasida tu aek, so ma aek i jala lam koring ma! Mardalan ma angka malim i jala jongjong di tonga-tonga ni sunge i. Boi ma halak Israel lewat sian sunge i. Gabe diingot nasida do ra na dibahen Jahowa di Laut Rara.

Dung piga-piga taon sahat ma halak Israel di Tano na Dijanjihon. Dibangun nasida ma jabu dohot kota disi. Boi ma nasida marladang dohot manuan anggur. Gok do sipanganon dohot siinumon disi. Digoari do tano i tano na gok susu dohot madu.