Pagkatapos nin dakul na taon bilang lider kan Israel, madali nang magadan si Moises. Sinabi saiya ni Jehova: ‘Bako ka an madara sa mga Israelita palaog sa Dagang Panuga. Pero ipapahiling ko saimo an dagang iyan.’ Pinakiulayan ni Moises si Jehova na magpili nin bagong lider na magiya sa mga Israelita. Sinabi saiya ni Jehova: ‘Magduman ka ki Josue. Sabihon mo saiya na siya an napili ko.’

Sinabi ni Moises sa mga Israelita na madali na siyang magadan asin na si Josue an pinili ni Jehova na madara sainda palaog sa Dagang Panuga. Dangan sinabi ni Moises ki Josue: ‘Dai ka matakot. Tatabangan ka ni Jehova.’ Tapos, nagtukad si Moises sa tuktok kan Bukid nin Nebo, kun sain ipinatanaw saiya ni Jehova an dagang ipinangako Niya ki Abraham, Isaac, saka Jacob. Nagadan si Moises sa edad na 120.

Sinabi ni Jehova ki Josue: ‘Magbalyo kamo sa Salog nin Jordan, asin maglaog sa Canaan. Tatabangan taka arog ki Moises. Dapat mong basahon an sakong Katugunan aroaldaw. Dai ka matakot. Kusugan mo an buot mo. Sige na, gibuha an ipinapagibo ko saimo.’

 Nagsugo si Josue nin duwang espiya sa siyudad nin Jerico. Sa sunod na istorya, maaaraman ta kun ano an nangyari duman. Kan magbalik sinda, ibinareta ninda na magayon na pagkakataon idto para lumaog sa Canaan. Kan sunod na aldaw, sinabi ni Josue sa mga Israelita na mag-irimpake na. Dangan pinainot niya sa Salog nin Jordan an mga saserdote na nagdadara kan kaban kan tipan. Baha an salog. Pero pagtungtong kan mga saserdote sa tubig, puminundo an pagbulos kaiyan asin namara an salog! Naglakaw an mga saserdote pasiring sa tahaw kan salog asin dai duman naghali sagkod na dai pa nakakabalyo an gabos na Israelita. Sa hiling mo, naipagirumdom daw sainda kan milagrong ini an ginibo ni Jehova sa Dagat na Pula?

Pakatapos nin halawig na panahon, nakaabot man giraray an mga Israelita sa Dagang Panuga. Puwede na sindang magtugdok nin mga harong asin mga siyudad. Puwede nang magkaigwa nin mga uma, mga ubasan, asin mga tanuman nin kahoy. An lugar na iyan garo pigbubulusan nin gatas asin tangguli, o dugos.