Enggo ertahun-tahun ipinpin Musa kalak Israel, janah gundari Musa nggo seh kel tuana. Nina Jahwe man baNa, ‘Labo kam si maba kalak Israel ku Taneh Perjanjin, tapi banci nge itatapndu taneh e. Emaka ipindo Musa gelah lit si nggantiken ia guna minpin kalak Israel. Nina Jahwe ngaloisa, ‘To, dahi Josua, ras kataken maka ia si nggantiken kam.’

Lawes me Musa ndahi bangsa Israel, janah ikatakenna maka lanai gedang umurna, ras Josua me si ipilih Jahwe minpin kalak Israel ku Taneh Perjanjin. Nina Musa man Josua, ‘Ula kam mbiar. Jahwe si nampati kam.’ La ndekah kenca si e, nangkih Musa ku Gunung Nebo. I je ituduhken Jahwe taneh si ijanjikenNa man Abraham, Isak, ras Jakup. Dungna mate me Musa bas umur 120 tahun.

Nina Jahwe man Josua, ‘Laweslah kena ku taneh Kanaan arah Lau Jordan. Kusampati nge kam bagi Aku nampati Musa. Ula kam lupa tiap wari mbaca Undang-Undang si nggo Kubereken. Ula kam mbiar, arus kam pang. Dalanken kerina si Kuperentahken.’

 Isuruh Josua me dua mata-mata ku kuta Jeriho. Bas pasal selanjutna kari, iceritaken kai si terjadi i je. Sanga mata-mata e mulih je nari, nina kalak e, ‘Gundari me waktuna kita masuk ku taneh Kanaan.’ Paginna, isuruh Josua kalak Israel ersikap gelah berangkat kalak e. Imam-imam si maba peti perpadanen isuruh Josua erdalan arah lebe. Sanga si e, Lau Jordan sangana galang launa. Tapi kenca imasukken imam nahena ku lau, ngadi mis lau e janah dungna kerah launa! Cinder me imam-imam i tengah-tengah Lau Jordan si nggo kerah e seh asa kerina kalak Israel nggo lewat. Banci jadi sanga ngidah kejadin e, inget kalak e kai si pernah terjadi i Lawit Merah.

Meriah kel ukur kalak e perban dungna seh ia ku Taneh Perjanjin. Gundari nggo banci banna rumahna ras kutana. Banci ka kalak e erjuma janah nuan anggur bas taneh si mehumur. Mbue kel pangan i je janah bas ingan e mbue susu ras madu.