Mmaleli Mizé osogorhela nlogo na Izrayel mwa vyaka dhinjene, nsaka na okwa waye nela waddamela. Nona, Yehova omwaddela: ‘Mizé, weyo kunafiyihe nlogo ntti mu Elabo Yottomeliwa. Ovano ddinfuna ddutonyihedhe elaboya bahi.’ Venevo, Mizé omuloba Yehova wi amusakule muttu mwina onasogorhele nlogo. Yehova omwakula: ‘Kamwaddele Josuwé wi ddi iyene onasogorhele nlogo naga.’

Mizé odhowa waddela nlogo notene wila iyene ohalile vang’onovi n’okwa, vina Yehova omusakula Josuwé wi eddihe nlogo mpaka Elabo Yottomeliwa. Nomala Mizé omulibiha Josuwé: ‘Kuwove elobwene. Yehova onele oukamihedha.’ Mizé mmaleliye ologa, owela vamutompini va Mwango Nebo, Yehova omulagiha elabo yalibeliye wavaha makolo aba: Abramu, Izaki na Jakob. Mizé okwile bana vyaka 120.

Yehova omwaddela Josuwé: ‘Kabuwa Mwinje Jordau, ovolowe mu Kana. Miyo ddinele oukamihedha ninga mwakoselemi na Mizé. Weyo onofuniwana wengesege Nlamulo naga masiku otene. Onajeriheye. Libá murima. Dhowá wavirihemo dhetedhene dhinaurumemi.’

 Josuwé oharuma anamareza wi avolowe mu Jeriko. Epaddi ejo enadhewo, ninele osunza epadduwile. Anamareza mwiyelelani, ahidhana muselu waloga wila obule wali mudhidhi w’ovolowa mu Kana. Mumangwananimwa, Josuwé ohaddela nlogo wila avisasanyedhe. Mmaleliye oawaddela anamakutta wila attukule yobo muli dha nipagano, asogorhena o Mwinje Jordau. Mwinjeya wahikana muneri. Mwadhawene, munyigaleli anamakutta manjeya, agaweya vari-vari! Anamakutta ahisusela vari va mwinje ahimela venevo mpaka nlogo notene na Izrayel wabuwela kobela yina. Kunubuwela wila matikiniho aba ahawubutxedha yapadduweli o Nyaza Wofila?

Apa pawodhile ana Izrayel ofiya Mwilaboni Yottomeliwa. Mwenemo anwodha omaga numba na mittette. Anwodha olima mindda, wala mvidera, na milima dhina. Yali elabo yana wiyi na mukaka.