Muze Mose hasongwela vungu lia A-Izalele ha miaka yinji, te hikwasala hakehe hanga afwe. Yehova yamulweza ngwenyi: ‘Hi yena ko mukatwala A-Izalele mu Chifuchi cha Chilakenyo. Alioze mungwecha hanga uchimone.’ Chocho Mose yeta kuli Yehova hanga asakule kasongo mweka yoze te masongwela A-Izalele. Yehova yamulweza ngwenyi: ‘Yako kuli Yoshua, nawa mulweze ngwo iye mwe natongola.’

Mose yalweza vungu lia A-Izalele ngwenyi, te hikwasala hakehe hanga afwe, nawa ngwenyi, Yehova hasakula kulu Yoshua hanga anusongwele mu Chifuchi cha Chilakenyo. Chocho, Mose yalweza Yoshua ngwenyi: ‘Kanda wivwa woma. Yehova makakukwasa.’ Muze te ahwisa kuhanjika, Mose yakanduka helu lia Mulundu wa Nebo, koko Yehova yamulweza chifuchi chize alakenyene kuli Apalahama, Izake, ni Yakomba. Mose kafwile ni miaka 120.

Yehova yalweza Yoshua ngwenyi: ‘Zaukenu Lwiji Yordau, hanga nuye ku Kanana. Mungukukwasa ngwe chize nakwashile Mose. Sako shindakenyo ngwe unatange Shimbi yami matangwa eswe.  Kanda wivwa woma. Takama. Yako hanga ulinge yeswe yize ngunakutumu kulinga.’

Yoshua yatuma ngendeshi aali mu mbonge ya Yeriku. Ha chishima chize muchisulaho, mutulilongesa nawa ha yize yalingiwileko. Muze afunyine, ayo yalumbununa lusango ngwo, waze kapwile mashimbu apema akunjila mu Kanana. Mukwachako, Yoshua yalweza vungu lia A-Izalele hanga achize chilombo cho. Hachino, yatuma asasendote waze te anambate mushete wa usendo hanga atetekele kulutwe ndo ku Lwiji Yordau. Lwiji te kanazale chinji. Alioze, muze molu ja asasendote aliachile mu meya, lwiji yecha kufutunuka, chocho meya yaputuka kutepuluka! Asasendote yaya ndo hakachi ka lwiji, yamanaho ndo muze vungu lieswe lia A-Izalele liazaukile ni kuya sali likwo. Shina chikomokeso chino, chaewulwile chize Yehova alingile ha Kalunga-Lwiji Muchila?

Muze hikwapalika miaka yeswayi, mba A-Izalele yanjila mu Chifuchi cha Chilakenyo. Ayo kahashile kutunga mazuwo ni mambonge. Kahashile nawa kulima minda, vinyu ni mihuko yeka ni yeka. Chifuchi chino chapwile ni yamwa ni uchi unji.