Moses ama ada nditọ Israel usụn̄ ke ediwak isua. Edi ke ini n̄kpa esie ekekperede, Jehovah ama ọdọhọ enye ete: ‘Idịghe afo edida nditọ Israel idụk Isọn̄ Un̄wọn̄ọ. Edi nyayak fi adada okụt isọn̄ oro.’ Ntre Moses ama eben̄e Jehovah ete emek owo en̄wen emi edidade mmọ usụn̄. Jehovah ama ọdọhọ enye ete: ‘Ka kọdọhọ Joshua ke enye edida mmọ idụk isọn̄ oro.’

Moses ama ọdọhọ nditọ Israel ke imọ imọn̄ ikpa, ke Jehovah emek Joshua ada mmọ odụk Isọn̄ Un̄wọn̄ọ. Enye ama ọdọhọ Joshua ete: ‘Kûyak idem enyek fi. Jehovah ayan̄wam fi.’ Ibịghike Moses ama aka Obot Nebo, ndien Jehovah ama owụt enye isọn̄ emi enye ọkọn̄wọn̄ọde ndinọ Abraham, Isaac, ye Jacob. Moses akakpa ke ini enye ekedide isua 120.

Jehovah ama ọdọhọ Joshua ete: ‘Be Akpa Jordan ka isọn̄ Canaan. Nyan̄wam fi nte n̄kan̄wamde Moses. Kụt ete ke omokot Ibet mi kpukpru usen. Kûfehe ndịk. Nyene uko. Ka kanam se ndọhọde fi anam.’

Joshua ama ọdọn̄ owo iba ẹkeyep obio Jericho.  Ke Ibuot 30, iyokụt se iketịbede ini mmọ ẹsịmde do. Ini mbon uyep oro ẹkenyọn̄de ẹdi, mmọ ẹma ẹdidọhọ ke edi se ibede idụk isọn̄ Canaan. Edem usen oro, Joshua ama ọdọhọ kpukpru owo ẹtan̄ n̄kpoduoho mmọ. Akpa Jordan ama ọtọ ọyọhọ ofụri mben esie, edi Joshua ama ọdọhọ mme oku ẹmen ekebe ediomi ẹbe iso ẹkedụk akpa oro. Ndondo oro mme oku ẹkesịnde ukot ke akpa oro, mmọn̄ oro ama atuak ada ke ubọk n̄kan̄ kiet, edi n̄kan̄ eken ama ewet osụhọde onyụn̄ asat. Mme oku ẹma ẹsan̄a ẹkeda ke ufọt isọn̄ akpa oro tutu kpukpru nditọ Israel ẹsan̄a ẹbe ẹda ke n̄kan̄ eken. Ndi emekere ke utịben̄kpọ oro ama anam nditọ Israel ẹti se Jehovah akanamde ọnọ mmọ ke Ididuot Inyan̄?

Nditọ Israel ẹma ẹsịm Isọn̄ Un̄wọn̄ọ ndien ke akpatre. Mmọ ẹma ẹkeme ndibọp ufọk ndụn̄ nnyụn̄ nsiak mbufa obio. Mmọ ẹma ẹtọ in̄wan̄, ẹnyụn̄ ẹtọ vine ye nsio nsio mfri eken. Nti udia ye mmịn ama awak ke Isọn̄ Un̄wọn̄ọ tutu ẹkot enye isọn̄ emi ọfiọrọde mmọn̄eba ye aranọkwọk.