De Moses isch vil Jahr lang de Afüehrer vo de Israelite gsi. Glii muess er aber sterbe. Jehova seit zu ihm: «Du wirsch d Israelite nid is versprochene Land bringe. Aber du dörfsch es gseh.» De Moses fragt, öb Jehova e neue Afüehrer chönnt uswähle, wo zum Volk luegt. Jehova seit ihm: «Gang zum Josua und säg ihm, dass ich ihn usgwählt ha.»

De Moses erklärt de Israelite, dass er glii wird sterbe und dass Jehova de Josua usgwählt het, um si is versprochene Land z füehre. Denn seit de Moses zum Josua: «Muesch kei Angscht ha – Jehova wird dir helfe.» Jetzt gaht de Moses uf de Berg Nebo. Wo er uf em Gipfel isch, zeigt ihm Jehova s Land, wo er em Abraham, em Isaak und em Jakob versproche het. Nachher stirbt de Moses mit 120 Jahr.

Jehova seit zum Josua: «Gang mit em Volk dur de Jordan und lauf denn mit ihne wiiter uf Kanaan. Ich wird dir helfe, genauso wie ich au em Moses ghulfe ha. Vergiss eifach nid, jede Tag i mim Gsetz z lese. Muesch kei Angscht ha. Bis muetig. Gang und mach alles eso, wie ichs dir gseit ha.»

De Josua schickt zwei Spion i d Stadt Jericho. Was dört passiert, ghörsch denn i de nöchschte Gschicht. Wo si wider zrugg chömmed, verzelled si, dass jetzt en guete Ziitpunkt isch, uf Kanaan z gah. Grad am nöchschte Tag seit de Josua zu de Israelite, si sölled d Zelt zämepacke. D Prieschter, wo d Bundeslade träged, schickt er scho mal vorus zum Fluss, wo Jordan heisst. De het grad Hochwasser. Wo d Prieschter aber mit ihrne Füess s Wasser berüehred, staut Jehova de Fluss und s reschtliche Wasser flüsst ab. D Prieschter stöhnd i d Mitti vom trochne Jordan und warted, bis alli uf de andere Siite sind. Was meinsch: Isch echt dur das Wunder de Israelite nid grad wider i Sinn cho, was Jehova am Rote Meer gmacht het?

Nach all dene vilne Jahr sind d Israelite endlich im Land acho, wo Jehova ihne versproche het. Jetzt baued si Hüüser und Städt und si chönnd Felder, Fruchtbäum und Wiigärte ha. Es git ganz vil gueti Sache zum Esse und zum Trinke. Us dem Grund seit mer em s Land, wo Milch und Honig flüsst.