Kakaliaichi Moisés nekiipüʼüin na israeliitakana, alüʼütsü nükalia süpüla outaa. «Nnojoluinjachi piain antirüin na israeliitakana suluʼumüin tü Mma Anasü taapajatkat namüin. Teeʼiyateerü neʼe pümüin tü mmakat piʼraiwa shia», nümakalaka Jeʼwaa nümüin. Nuchuntaka Moisés nümüin Jeʼwaa nüneeküinjachin wanee nekiipüʼü na israeliitakana süpüla naaʼinmajüin naya. «Paashajaa nümaa Josué otta püma nümüin niain chi taneekakai», nümaka Jeʼwaa nümüin.

Nüküjain Moisés namüin na israeliitakana sülüʼülüin nükalia süpüla outaa jee nüneekünüin Josué nutuma Jeʼwaa süpüla nikiipüʼüin naya suluʼu tü Mma Anasükat. «Nnojo mmoluin pia, nükaaliinjeechi pia Jeʼwaa», nümakalaka Moisés nümüin Josué. Nuʼunaka Moisés süraloʼumüin tü uuchikat Nebo. Niiʼiyataka Jeʼwaa nümüin chayaa tü mma nüküjakalü achiki paala nümüin Abraham, Isaac otta Jacob. 120 nuuyase Moisés outapa nia.

Müshi Jeʼwaa nümüin Josué: «Pülata tü süchikat Jordán, püntaiwa Canaánmüin. Takaaliinjeechi pia maʼaka takaaliinjain Moisés. Paashajeʼera waneepia tü Tanüikikat, nnojo motuin paaʼin shia. Nnojo mmoluin pia jee yalayala paaʼin. Puʼuna maa jee paaʼinra süpüshuaʼa tü taluwataakalü anain pia».

 Nuluwataaka Josué piamashii ajayajülii suluʼumüin tü pueulokot Jericó. Sünain tü wanee ekirajaayakat, watüjaweerü aaʼu sooʼomüin süchiki tü alatakat chayaa. Naleʼejapa na ajayajüliikana Jericójee, naküjain anain maʼin süpüla nekerotuin Canaánmüin. Waneemüin kaʼi süchikijee tia, nuluwataaka Josué na israeliitakana süpüla yapajüinjanain naya süpüla oʼunaa. Nuluwataaka palajana na sacerdoote alüʼüjakana tü jurasükeetkat süpüla nalatüinjatüin tü süchikat Jordán. Asetüsü tü süchikat soʼu tia. Shiasaʼa nacholetapa shiroku tü wüinkat na sacerdootekana, ashaʼwalaasü tü süchikat. Nashaʼwalaaka pasanain sünain tü süchikat süpüla nalatüinjanain na israeliitakana. Neʼrapa tia na israeliitakana, ¿sotusüche naaʼin tü naaʼinrakat Jeʼwaa napüleerua wanaa sümaa nalatüin tü palaa Ishosükat?

Wainma juya chajanain na israeliitakana isashiipaʼa, antüshii naya suluʼumüin tü Mma Anasükat. Aluʼujasaʼa jooluʼu, eeinapa süpüla nakumajüin nepia, kepiain naya suluʼu pueulo, napünajüin jee kaʼttiain naya. Joutsü emiraa suluʼu tü mmakat Canaán, «wanee mma eeka aluʼu leechi otta mapa» münüsü shia.