Moisés ningo heta tiémporema ogia kuri umi israelítape, péro koʼág̃a ijedáma ha omanombotáma. Peteĩ día Jehová heʼi chupe: “Nde neremoingemoʼãi umi israelítape pe yvy apromete vaʼekuépe chupekuéra. Péro ahechaukáta ndéve pe yvy remano mboyve”. Upéi Moisés ojerure Jehovápe oiporavo hag̃ua peteĩ kuimbaʼe omoakã vaʼerã hekovia pe puévlope. Jehová heʼi chupe: “Eñeʼẽ Josué ndive ha ere chupe che aiporavo hague chupe upearã”.

Upe rire Moisés heʼi umi israelítape haʼe omanombotaitemaha ha Jehová oiporavoha Josuépe omoakã hag̃ua chupekuéra hekovia. Heʼi avei Josué ogiataha chupekuéra oike hag̃ua pe yvy Jehová opromete vaʼekuépe. Moisés heʼi Josuépe: “Ani rekyhyje, Jehová nepytyvõta”. Upe riremínte Moisés ojupi sérro Nébope ha upe guive Jehová ohechauka chupe pe yvy opromete vaʼekue Abrahán, Isaac ha Jacóbpe. Upéi Moisés omano orekópe 120 áño.

Jehová heʼi Josuépe: “Ehasa pe rrío Jordán ha eike Canaánpe. Che aiméta nendive aime haguéicha Moisés ndive. Elee vaʼerã káda día pe lívro de la Léi. Ani rekyhyje, ndepyʼaguasu vaʼerã ha ejapopaite opa mbaʼe amandáva ndéve”.

 Josué omondo mokõi espíape ovichea hag̃ua Jericó. Pe istória oúvape ñaaprendéta mbaʼépa oiko vaʼekue upépe. Umi mokõi espía ou jeýrõ guare Jericógui heʼi koʼág̃a ikatumaha oaprovecha hikuái oike hag̃ua Canaánpe. Al día sigiénte Josué heʼi enterovépe oprepara hag̃ua ikosakuéra okrusa hag̃ua hikuái pe rrío Jordán. Puntaitépe oho umi saserdóte oraháva pe Árka del pákto. Upérõ pe rrío tuichaiterei ojupi, péro umi saserdóte opyrũvo pe ýpe, pe rrío ndosyryvéi ha iséko asy opyta pe haʼekuéra ohasatahárupi. Upéi ofaltárupi alamita umi saserdóte okrusapa hag̃ua pe rrío, opyta hikuái ha ohaʼarõ okrusapa raẽ umi israelita. Oiméne ohechávo hikuái la oikóva imanduʼa raʼe pe oiko vaʼekuére mar Rójope.

Umi israelita oike sapyʼa pe yvy Jehová opromete vaʼekuépe chupekuéra. Koʼág̃a ikatútama ojogapo ha oiko hikuái siudápe. Ikatútama avei oñemitỹ, oreko hiʼuérta ha parralty. Canaánpe hembypa vaʼekue kamby ha eíra.