Moisés nitre Israel ye jie ngwani kä kwati krubäte te, akwa kä namanina braibe niara käne. Jehová niebare ie: ‘Mä ñaka ai näin nitre Israel ngwena Kä Käbämikani yete. Akwa tikwe kä ye mikai tuare mäi’. Angwane, Moisés ribebare Jehovai niara rabadre ni denkä iti ji ngwankäre ne kwe rabadre juta ye ngübarebiti. Jehová niebare ie: ‘Blite Josué yebe aune niara ye dianinkä ji ngwankäre mäkwe nie ie’.

Kä namanina braibe Moisés käne aune Jehovakwe Josué dianinkä juta ye jie ngwankäre nemen Kä Käbämikani ietre yekänti ye mikani gare kwe ietre. Moisés niebare Josué ie: ‘Ñan kä jürä ngwan jabätä. Jehovakwe mä dimikai’. Kä nikani braibe ta angwane, Moisés nikani ngutuä Nebo mente kwin yebiti. Yete, Jehovakwe kä käbämikani Abrahán, Isaac aune Jacob ie ye mikani tuare kwe ie. Kä nämene 120 Moisebiti ye ngwane krütani.

Jehová niebare Josué ie: ‘Nän ñö Jordán yete ta aune mä rika nemen Canaán. Tikwe Moisés dimikani ye erere, tikwe mä dimikai. Tikwe Kukwe Biani Nuaindre yebätä käre mäkwe ñäkä, ñaka ye käi kwitaka jabiti. Mä ja ngwan dite aune ñan kä jürä ngwan jabätä. Tita dre ribere mäi ye jökrä mäkwe nuain’.

 Juta Jericó yekänti Josué nitre kä tuabitikä nibu juani. Dre namani bare ye rabai gare ja känenkäre nie kukwe mada kira yebätä. Nitre kä tuabitikä janamene Jericó nükaninta ye ngwane, kä nämene kwin krubäte nänkäre Canaán ye mikani gare kwetre. Jetebe se kwrere, Josué niebare juta yei niaratre rabadre ja mike juto. Käne niarakwe nitre sacerdote nämene kaja deme ngwen ye juani ñö Jordán yete. Ñö nämene nen ere krubäte, akwa nitre sacerdote ngoto mikani ñöte ye ngwane, ñö ñaka namani nen aune namani nötare. Ye ngwane nitre sacerdote nänbare kä nötare yebiti. Niaratre namani ñö ötare ta ye ngwane, namanintre nünaninkä aune nitre Israel jökrä nikani ta nemen kä kwäräkri. Jondron ñan tuabare tuani kwetre ye ngwane, Jehovakwe dre nuainbare mar Rojo yete ye nükaninta törö ietre, ¿raba ruin mäi?

Kä nikani kwati krubäte ta ye bitikäre, nitre Israel namani Kä Käbämikani ietre yekänti. Yete niaratre namanina juto ju aune juta sribekäre jeñe ja kräke. Niaratre rabadre nüra nökö, uva, aune jondron mada mada ye nökö ja kräke. Kä yete leche aune munkö nämene krubäte.