Kombunda yokuhongorera otjiwaṋa tjaIsrael oure wozombura ozengi, Moses nambano wa ri pokukoka. Jehova we mu raera kutja, ‘Kaove ngu mo hitisa Ovaisrael mEhi Ekwizikwa. Posiya me ku yandjere kutja u mune ro.’ Okuzambo Moses wa ningira Jehova kutja ma toorore omunane omupe ngu ma tjevere otjiwaṋa. Jehova wa tja ku ye: ‘Twende ku Josua nu u kemuraere kutja ami mba toorora ye okurira omunane.’

Moses wa raera otjiwaṋa kutja eye nai wa kurupa nu u ri pokukoka, nu e ve raere kutja Jehova wa toorora Josua kutja a rire ngu me ve hitisa mEhi Ekwizikwa. Okuzambo Moses wa raera Josua na tja: ‘O tira. Muhona me ku vatere.’ Tjimanga tja za mbo wa ronda kOndundu Nebo, Jehova kekemuraisira ehi nda kwizikira Abraham, Isaak na Jakob. Moses wa ri nozombura 120 tja ṱa.

Jehova wa raera Josua na tja: ‘Konda Onḓonḓu Jordan nu u yende koKanaan. Ami me ku vatere otja tji mba vatera Moses. Aruhe kondja okulesa Omatwako wandje eyuva arihe. O tira nu yanḓipara. Kayende nu u katjite atjihe tji mbe ku rakiza okutjita.’

Josua wa hinda ovakonḓonone 2 kutja ve kakonḓonone otjihuro tjaJeriko. Mehungi ndi mari kongorere ko matu  kerihonga ovingi ohunga nokutja pa kayenda ye. Indu tji va kotoka, owo va tjivisa kutja tjiri tjari otjiṋa otjiwa okukamuna Kanaan. Eyuva nda kongorera ko, Josua wa raera otjiwaṋa kutja tji rongere. Okuzambo wa hinda ovapristeri komurungu mbaave tjindi otjipwikiro tjomerikutiropamwe okuyenda kOnḓonḓu Jordan. Onḓonḓu aai pupu, posiya tjimanga ozombaze zovapristeri tji za ṱuna komeva, onḓonḓu ya isa okupupa nomeva ya pwira! Ovapristeri va kayenda ngandu mokati konḓonḓu nave kurama mbo ngandu otjiwaṋa atjihe tjaIsrael tji tja konda munda imbwi owarwe. Mo munu kutja otjihimise tji, tje ve zemburukisa imbi mbya tjitwa i Jehova pOmurongawotuu po?

Kombunda yozombura azehe nḓa, Ovaisrael va kahita mEhi Ekwizikwa. Owo va yenena okutunga ozondjuwo novihuro. Va yenena okukara nomahi womakunino nomiti vyomandjembere. Oro rari ehi nde urire omaihi nouitji wozonywitji.