Pengudah betaun-taun nguluka bansa Israel, Moses nyau semak ba pengujung idup iya. Ku Jehovah: ‘Ukai nuan ke ngulu orang Israel tama ngagai Menua ti Udah Disemaya. Taja pia, Aku deka ngasuh nuan meda menua nya.’ Udah nya, Moses ngasuh Jehovah milih tuai ti baru nguluka orang Israel. Jehovah madahka iya: ‘Mansang ngagai Josua, lalu padah ngagai iya, iya udah dipilih.’

Moses madah ngagai bansa Israel iya deka mati enda lama agi lalu Jehovah udah milih Josua nyadi tuai ke ngulu sida tama ngagai Menua ti Udah Disemaya. Moses madah ngagai Josua: ‘Anang takut. Jehovah deka nulung nuan.’ Enda lama udah nya, Moses ngagai atas Bukit Nebo, endur Jehovah nunjukka iya menua ti udah disemaya ke Abraham, Isak enggau Jakop. Moses beumur 120 taun maya iya mati.

Jehovah madah ngagai Josua: ‘Bejalai meraka Sungai Jordan, lalu mansang ngagai menua Kanaan. Aku deka nulung nuan baka Aku ke udah nulung Moses. Nuan patut macha Adat Aku ninting hari. Anang takut. Nyadi meh berani. Mupuk lalu kereja utai ke diasuh Aku ngagai nuan.’

 Josua nganjung dua iku pematau ngagai nengeri Jeriko. Ba cherita ke nangkanka tu, kitai ulih belajar mayuh agi pasal utai ke nyadi ba dia. Maya seduai pulai, sida madah nya meh maya ti manah tama ngagai menua Kanaan. Ba hari siti, Josua ngasuh bansa Israel muka kem. Lalu iya ngasuh bala imam ke ngangkat peti lampang batu adat bejalai dulu ngagai Sungai Jordan. Ai sungai nya benung ampuh. Tang pengudah bala imam ngindik ai sungai, ai nya ngetu rarat lalu surut! Bala imam bejalai ba tengah sungai lalu bediri dia lebuh bansa Israel meraka ke seberai. Enda ke kereja ajih tu ngingatka sida pasal utai ke udah digaga Jehovah ba Tasik Mirah?

Pengujung iya, pengudah betaun-taun, orang Israel datai ba Menua ti Udah Disemaya. Sida ulih ngaga rumah enggau kuta. Sida ulih betanam, ngembuan ladang anggur sereta kebun buah. Bisi mayuh pemakai enggau utai ti diirup ba Menua ti Udah Disemaya nyentukka iya dikumbai menua ti kaya sereta ami.