Israela ni hpe shaning law law woi awn ngut ai hpang, Mawshe gaw asak kaba wa nna si hkyen sai. Yehowa shi hpe tsun ai gaw ‘Israela masha ni hpe Ga Sadi Tawn Da Ai Mungdan de woi sa na wa gaw nang n re ai. Raitim, dai mung hpe mu na ahkang gaw jaw na.’ Dai majaw, Mawshe gaw Israela ni hpe woi awn na matu, ningbaw nnan lata ya na matu Yehowa hpe hpyi shawn ai. Yehowa gaw ‘Yawshu hpang sa su, ngai lata ai wa gaw shi rai ai hpe sa tsun su’ nga nna Mawshe hpe tsun ai.

Mawshe gaw Israela ni hpe ngai gaw kade nna yang si hkyen sai majaw, Yehowa gaw nanhte hpe Ga Sadi Tawn Da Ai Mungdan de woi awn na matu Yawshu hpe lata da sai nga nna tsun ai. Mawshe gaw Yawshu hpe ‘Hkum hkrit! Yehowa nang hpe karum ya na re’ nga nna tsun ai. Dai hpang Mawshe gaw Nebo bum de lung mat ai. Dai shara hta, Yehowa gaw shi hpe Abraham, Isak, Yaku ni hpe jaw na ngu ga sadi jaw da ai mungdan hpe madun ai. Mawshe gaw asak 120 hta si mat ai.

Yehowa gaw Yawshu hpe: ‘Yawdan hka hpe rap nna Hkanan mung de sa su. Mawshe hpe karum ya wa ai zawn nang hpe mung ngai karum ya na. Nye a Tara ni hpe nang shani shagu hti ra ai. Hkum hkrit! Nden marai rawng u. Ngai galaw shangun ai mahkra hpe galaw u’ nga nna tsun ai.

 Yawshu gaw kin yu lahkawng hpe Yerihko mare de dat dat ai. Dai shara hta hpa byin ai hpe hpang na daw hta chye lu na re. Kin yu ni bai wa ai shaloi, ya aten gaw Hkanan Mung de shang na matu kaja htum aten re, nga nna tsun ai. Hpang shani hta, Yawshu gaw dap dabang zing na matu Israela ni hpe tsun ai. Yawshu gaw Yawdan Hka hpe rap na matu, ga shaka sumpu hpai ai hkinjawng ni hpe shawng kaw na sa na matu tsun ai. Yawdan hka mung hka kaba nna lim taw nga ai. Raitim, hkinjawng ni a lagaw hka hkra dat ai hte kalang ta, maga mi na lwi taw ai hka gaw hkring mat nna, maga mi na hka gaw matut lwi nna hkyet mat ai. Hkinjawng ni hka htumpa ka-ang du hkra sa nna dai hta tsap nga ai shaloi, Israela ni yawng gaw wora hkran de hkawm sa ma ai. Ndai mau hpa mabyin gaw Nawng Hkyeng Hka hta Yehowa galaw ya wa ai lam hpe bai myit dum shagun ai n re i?

Shaning law law na ai hpang, Israela ni gaw Ga Sadi Tawn Da Ai Mungdan de du mat wa sai. Shanhte gaw mare ni lu de nna, nta ni mung lu gap sai. Namsi namsaw hte tsabyi sun mung lu hkai sai. Dai mung gaw, nga chyu hte lagat jahku lwi ai mung re.