O na kau Mose nĩwatongoesye Aisilaeli kwa myaka mingĩ, ve ĩvinda yavikie weethĩa e vakuvĩ kũkwʼa. Yeova amwĩie atĩĩ: ‘Tiwe wĩlikya Aisilaeli Nthĩ ya Watho. Ĩndĩ nĩngũkwonyʼa nthĩ ĩsu.’ Na ĩndĩ Mose akũlya Yeova anyuve mũtongoi ũngĩ atongoesye andũ make. Nake Yeova amũsũngĩa amwĩa: ‘Enda vala ve Yosua, na ũimwĩa kana nĩwe ũkalikya Aisilaeli Nthĩ ya Watho.’

Mose nĩwatavisye mbaĩ ya Isilaeli kana nũkũkwʼa o mĩtũkĩ, na Yeova nũnyuvĩte Yosua amatongoesye malike Nthĩ ya Watho. Na ĩndĩ Mose amwĩa Yosua: ‘Ndũkakĩe. Yeova nũkũtetheesya.’ Ĩtina wa ĩvinda ĩkuvĩ, Mose nĩwambatie Kĩĩmanĩ kya Nevo, vala Yeova wamwonisye nthĩ ĩla wathĩte Avalaamu, Isaka, na Yakovo. Na Mose akwʼa e na myaka 120.

Yeova amwĩie Yosua atĩĩ: ‘Kĩla Ũsĩ wa Yolotani, na ũilika Kanaani. Ngaũtetheesya o ũndũ natetheeisye Mose. Kĩla mũthenya ĩkĩĩthasya nĩwasoma Mĩao yakwa. Ndũkakĩe. Ĩthĩwa na ũkũmbaũ. Enda na ũkĩka o ũndũ nakwĩaĩa.’

 Yosua nĩwatũmie athiani elĩ mathi ndũanĩ ya Yeliko. Nthĩnĩ wa ngewa ĩla ĩatĩĩe, tũkeemanyĩsya mũnango kĩla kyeekĩkie. Yĩla masyokie maisye kana yaĩ ĩvinda ĩseo ya kũthi Kanaani. Mũthenya ũla waatĩĩe, Yosua atavisye Aisilaeli mombanyʼe syĩndũ nĩ kana mathi. Na ĩndĩ eea athembi ala makuĩte ĩsandũkũ ya ũtianĩo matongoesye andũ malike Ũsĩnĩ wa Yolotani nĩ kana mainge. Ĩvinda yĩu ũsĩ ũsu waĩ na kĩwʼũ kingĩ mũno. Ĩndĩ yĩla maaũ ma athembi makiitie kĩwʼũ, kĩwʼũ kĩu nĩkyaekie kũvĩta na kyathela! Athembi asu nĩmaendie katĩkatĩ wa ũsĩ na maũngama vo nginya mbaĩ yonthe ya Isilaeli yainga ngalĩ ĩla ĩngĩ ya ũsĩ. We wĩona kyama kĩu ta kyatumie Aisilaeli malilikana ũndũ Yeova weekie Ũkanganĩ Mũtune?

Ĩtina wa myaka mingĩ, Aisilaeli nĩmesie kũlika Nthĩ ya Watho. Yu maĩ matonya kwaka nyũmba na ndũa. O na maĩ matonya kũĩma, kũvanda mĩsavivũ, na mĩtĩ ĩngĩ ya matunda. Yaĩ nthĩ yausũĩte ĩia na ũkĩ wa nzũkĩ.