Mu kukala ku pholo dia mundu ua Izalaiele, ku mivu iavulu Mozé ua kexile ku disukilu dia muenhu uê. Jihova ua mu tangela: ‘K’eie dingi ua-nda kuambata o mundu ua Izalaiele mu Ixi ia Kanana. Maji nga-nda ku bhangesa kumona o ixi dikanga.’ Mu kusuluka Mozé ua bhingi kua Jihova kusola muthu phala kuendesa o mundu. Jihova ua muambela uixi: ‘Tangela Josuué kuila, muéne ua-nda kala kupholo dia mundu.’

Mozé uambela o mundu kuila, muene ueji fua kiá, ni kuila Jihova ua solo Josuué kala muthu ua-nda kuendesa o mundu katé mu Ixi ia Kanena. Mozé uambela Josuué: ‘Kana kukala ni uôma. Jihova ua-nda ku kuatekesa.’ Mu kusuluka, Mozé uai katé ku thandu dia mulundu ua Nebu, bhenhobho Jihova ua mu londekesa o ixi ia kanene kua Mbalahamu, Izake ni Jakobo. Mozé ua kexile ni 120 a mivu kioso kiafu.

Jihova uambela Josuué: ‘Zauka o Ngiji ia Njolodá ndé mu ixi ia Kanana. Nga-nda ku kuatekesa, kála ki nga kuatekesele Mozé. Eie ua tokala kutanga o divulu dia ngonge izuua ioso. Ku kale ni uôma. Kala u kindanda. Kumbidila o izuelu ioso i nga ku tumu.’

 Josuué ua tumikisa kiiadi kia alondi mu mbanza ia Jedikó. Mu musoso ua-nda kaiela tua-nda dilonga se ihi ia bhiti. Kioso o alondi kia vutuka, ambe kuila kiene o kithangana kia tokalele phala kuia mu ixi ia kanana. Mu kimenemene, Josuué ua tumina o mundu, kubhongolola o ima ni ku disokejeka. Muene ua tumina o akunji akexile mu kuambata o álaka ia kikutu phala kuia ku pholo katé bhu Ngiji ia Njolodá. O ngiji iezalele kiavulu. Maji kioso o akunji kia diota o inama iâ mu menha, o menha mu ngiji a mateka o kusosoloka, o ngiji anga i kukuta! O akunji ai katé mu kaxi ka ngiji, iá emana muenhomo, o mundu uoso anga u zauka o ngiji katé ku sambua dia mukuá. Mudié, o kuila o madiuanu iá, a bhangesa akua Izalaiele kulembalala o kima kia bhangele Jihova mu Kalunga ka Kusuka?

Mu kubhita mivu iavulu, akua Izalaiele a bhixila mu Ixi ia Kanana. Ene eji tena kutunga jimbanza javulu ni jinzo. Eji dima mábhia, ni kukuna mixi ia mivide ni jimbutu ja mukuá. Ixi ia kexile mu kunguluka lete ni uiki.