Mosesa watangijile bena Isalela pa myaka yavula bingi. Byo ajinga pepi kufwa, Yehoba wamwambijile’mba: ‘Kechi yobe ukatwezha bena Isalela mu Ntanda ya Mulaye ne. Bino nsakukumwesha ino ntanda byo iji.’ Kepo Mosesa alombele Yehoba amba atongole muntu wa kutangijila bena Isalela. Yehoba wamwambijile’mba: ‘Yanga ukabuule Yoshua amba yeye natongola.’

Mosesa wabuujile bena Isalela amba katatakatu afwe, ne kuba’mba Yehoba watongola Yoshua kwikala ntangi wabo ukebatwezha mu Ntanda ya Mulaye. Kepo Mosesa aambijile Yoshua amba: ‘Kuba moyo ne. Yehoba usakukukwasha.’ Kufuma popo, Mosesa wayile peulu ya mutumba wa Nebo. Yehoba popo akamumwesheshe ntanda yo alayile bashakulu babo, Abalahama, Izaka ne Yakoba. Mosesa wafwile saka aji na myaka 120.

Yehoba wabuujile Yoshua amba: ‘Abukai Mukola wa Yodano, mutwele mu ntanda ya bena Kenana. Nsakukukwashanga byonka byo nakwashanga Mosesa. Utangenga Mizhilo yami pa juba pa juba. Kumvwa moyo ne. Chinchika. Yanga ukobe byo nakukambizha.’

 Yoshua watumine bamwendela ntanda babiji kuya na kumona biji muzhi wa Yeliko. Mu jishimikila jalondelapo, tukafunda pa byamwekele byo bayile ku uno muzhi. Byo babwelele, baambile’mba kijitu bulongo kuya mu ntanda ya bena Kenana mambo yawama bingi. Juba jalondejilepo, Yoshua wabuujile bena Isalela amba benengezhe kuya. Waambijile bañanga basendele jikwachi ja lulayañano amba batangileko kuya ku Mukola wa Yodano. Mukola wayujile bingi. Bino bañanga byo banyanchile mu mema, mema alekele kupita ne mukola kunshi waumine. Bañanga baimene pakachi ka mukola kufikatu ne bena Isalela bonse byo baabukile mukola. Walangulukapo’mba ka? Nanchi kino kya kukumya kibavulwilemo byaubile Yehoba pa Kalunga Kachila nyi?

Bena Isalela pano bafikile mu Ntanda ya Mulaye nangwa kya kuba baendele myaka yavula bingi. Batendekele kushimika mazubo ne mizhi. Bajiminenga kajo ne majimi a miñanzañanza ne a bipangwa bikwabotu. Ino ntanda mwavujile bingi mukaka ne buki.