တၢ်မၤလိ ၂၉
ယဟိဝၤယွၤဃုထၢထီၣ်စီၤယိၤၡူ
စီၤမိၤၡ့ကဲခိၣ်ကဲနၢ်လၢ ပှၤအံၣ်စရ့လးဖိတဖၣ်အဖီခိၣ် ယံာ်ဝဲအနံၣ်ဖးယံာ်လံ. ခဲအံၤ စီၤမိၤၡ့အသးပှၢ်ထီၣ်ဝဲဖးဒိၣ်လံ. ယဟိဝၤယွၤတဲဘၣ်အီၤလၢ– ‘နတမ့ၢ်ပှၤတဂၤလၢအကတီခိၣ်ရိၤမဲဘၣ် ပှၤအံၣ်စရ့လးဖိလၢ ကလဲၤနုာ်လီၤဝဲဆူ ကီၢ်တၢ်စံးပာ်အပူၤဘၣ်. ဘၣ်ဆၣ် ယကဒုးထံၣ်စိနၤ ကီၢ်တၢ်စံးပာ် လီၤ.’ ဝံၤဒီး စီၤမိၤၡ့ဃ့ယဟိဝၤယွၤလၢ ကဃုထၢထီၣ်ပှၤလၢအသီတဂၤ ဒ်သိးကကဲခိၣ်ကဲနၢ်လၢ ပှၤအံၣ်စရ့လးဖိတဖၣ်အဖီခိၣ်လီၤ. ဒီးယဟိဝၤယွၤတဲဘၣ်စီၤမိၤၡ့လၢ– ‘လဲၤဆူစီၤယိၤၡူအအိၣ်ဒီး တဲဘၣ်အီၤလၢ အဝဲမ့ၢ်ပှၤတဂၤလၢ ကကဲထီၣ်ပှၤအံၣ်စရ့လးဖိတဖၣ်အခိၣ်အနၢ်လီၤ.’
စီၤမိၤၡ့အသးပှၢ်ထီၣ်ဝဲဖးဒိၣ်လံအဃိ တဲဘၣ်ပှၤဂီၢ်မုၢ်လၢ တယံာ်လၢၤဘၣ်န့ၣ် အဝဲကသံဝဲဒီး ယဟိဝၤယွၤဃုထၢထီၣ် စီၤယိၤၡူဒ်သိး ကဆှၢဝဲပှၤဂီၢ်မုၢ်တဖၣ်အံၤလၢ ကီၢ်တၢ်စံးပာ်အပူၤန့ၣ်လီၤ. စီၤမိၤၡ့တဲဘၣ်စီၤယိၤၡူလၢ– ‘ပျံၤတၢ်တဂ့ၤ. ယဟိဝၤယွၤကမၤစၢၤနၤလီၤ.’ ဝံၤဒီး စီၤမိၤၡ့လဲၤထီၣ်ဝဲဆူ ကစၢၢ်နဘိအဒီခိၣ်လီၤ. ဖဲန့ၣ်န့ၣ် ယဟိဝၤယွၤဒုးထံၣ်စီၤမိၤၡ့လၢ ကီၢ်တၢ်စံးပာ်လၢအအၢၣ်လီၤအီလီၤဝဲလၢ ကဟ့ၣ်လီၤစီၤအၤဘြၤဟၣ်, စီၤအံၤစဲး ဒီးစီၤယၤကိာ်န့ၣ်လီၤ. ဖဲစီၤမိၤၡ့သံအခါ အသးနံၣ်အိၣ်ဝဲ ၁၂၀ လီၤ.
ယဟိဝၤယွၤ တဲဘၣ်စီၤယိၤၡူလၢ– ‘ခီဂာ်ထံကျိယၢ်ဒ့ၣ် ဒီးလဲၤနုာ်လီၤဆူကီၢ်ကနၤဧၣ်အပူၤတက့ၢ်. ယကမၤစၢၤနၤဒ်ယမၤစၢၤတ့ၢ်စီၤမိၤၡ့အသိးလီၤ. ဒီးယတၢ်သိၣ်တၢ်သီန့ၣ် နကဘၣ်ဖးအီၤကိးနံၤဒဲး. ပျံၤတၢ်တဂ့ၤ, အိၣ်ဒီးတၢ်သးဒူဒီး ကယဲၢ်တၢ်လၢယမၤလိာ်နၤန့ၣ် မၤအီၤခဲလၢာ်တက့ၢ်.’
စီၤယိၤၡူမၢလီၤပှၤကွၢ်ဟုၣ်တၢ်ခံဂၤ ဒ်သိးအဝဲသ့ၣ်ကလဲၤကွၢ်ဟုၣ်ဝဲဝ့ၢ်ယရံၤဃိအဂီၢ်န့ၣ်လီၤ. လၢတၢ်မၤလိလၢခံတခါအပူၤ ပကသ့ၣ်ညါအါထီၣ်လၢ တၢ်မနုၤဟဲကဲထီၣ်အသးဖဲဝ့ၢ်ယရံၤဃိလဲၣ်န့ၣ်လီၤ. ဖဲပှၤကွၢ်ဟုၣ်တၢ်ခံဂၤဟဲက့ၤအခါ အဝဲသ့ၣ်တဲဝဲလၢ ခဲအံၤမ့ၢ်တၢ်ဆၢကတီၢ်ဂ့ၤဝဲလၢ ပကလဲၤနုာ်လီၤဆူ ကီၢ်ကနၤဧၣ်အပူၤလီၤ. လၢခံတနံၤန့ၣ် စီၤယိၤၡူတဲဘၣ်ပှၤဂီၢ်မုၢ်လၢ အဝဲသ့ၣ်ကဘၣ်ကတဲာ်ကတီၤထီၣ်အသး လၢကလဲၤတၢ်အဂီၢ်လီၤ. ဝံၤဒီးစီၤယိၤၡူမၢ ပှၤလုၢ်တၢ်အဒိၣ်တဖၣ် လၢအစိာ်ဝဲ တၢ်အၢၣ်လီၤအီလီၤတလါ ဒ်သိးကလဲၤလၢညါဆူ ထံကျိယၢ်ဒ့ၣ်လီၤ. ဒီးဘၣ်ဖဲ ထံကျိယၢ်ဒ့ၣ်န့ၣ် ထံဒိၣ်ထီၣ်ဝဲအဆၢကတီၢ်လီၤ. ဘၣ်ဆၣ် ဖဲပှၤလုၢ်တၢ်အဒိၣ်တဖၣ် ယီၢ်လီၤဝဲထံဖံးခိၣ်အခါ ထံပတုာ်ယွၤလီၤဝဲ ဒီးဃ့ထီဝဲလီၤ. ပှၤလုၢ်တၢ်အဒိၣ်တဖၣ် လဲၤလၢထံကျိခၢၣ်သးဒီးဆၢထၢၣ်ဝဲဖဲန့ၣ်လီၤ. ဝံၤဒီးပှၤအံၣ်စရ့လးဖိတဖၣ် ခီဂာ်ဝဲထံကျိယၢ်ဒ့ၣ်လီၤ. တၢ်မၤအသးအံၤ ကဒုးသ့ၣ်နီၣ်ထီၣ်က့ၤ ပှၤအံၣ်စရ့လးဖိတဖၣ်လၢ ဆၢကတီၢ်ဖဲယဟိဝၤယွၤ မၤတၢ်လီၤလးလၢပီၣ်လဲၣ်ဂီၤ, တမ့ၢ်ဘၣ်ဧါ.
ခဲအံၤန့ၣ် ပှၤအံၣ်စရ့လးဖိတဖၣ် အိၣ်ဘၣ်ဝဲလၢကီၢ်တၢ်စံးပာ်အပူၤလံ. အဝဲသ့ၣ်သူၣ်ထီၣ်ဝဲအဟံၣ်အဃီ ဒီးဝ့ၢ်တဖၣ်လီၤ. ဒီးပှၤအံၣ်စရ့လးဖိတဖၣ် သူၣ်အီၣ်ဖျးအီၣ်တၢ်လၢစံာ်ပူၤ, သူၣ်ဝဲစပံးသၣ်ကရၢၢ် ဒီးသူၣ်ဝဲတၤသူတၤသၣ်လၢအဂၤတဖၣ်စ့ၢ်ကီးလီၤ. ကီၢ်တၢ်စံးပာ်န့ၣ် မ့ၢ်ကီၢ်လၢအပှဲၤဝဲဒီးတၢ်နုၢ်ထံဒီးကနဲစီလီၤ.
“ဒီးယွၤကဆှၢနၤ တထံၣ်ဃီ, ဒီးကမၤမံနသးလၢ တၢ်အလီၢ်ဃ့အပူၤ” လီၤ.—ယၡါယၤ ၅၈:၁၁
