Moˉseˍ Iˉsaˍreˍlaˆ chaw htaꞈ sheh kʼai ve maw jaˇ peuˬ. Chi teˇ hkui yawˇ suh la paˇ neˇ ve yoˬ. Yaˬhoˉvaˬ Moˉseˍ htaꞈ kʼoˆ piˇ ve, ‘ngaˬ ka tiꞈ te taˍ ve mvuhˇ miˬ awˬ hkʼaw lo Iˉsaˍreˍlaˆ chaw htaꞈ nawˬ maˇ gʼa shiˍ loꞈ˗e. Yaꞈ hkʼaˇ, ngaˬ nawˬ htaꞈ mvuhˇ miˬ oˇ ve mawˬ tcuh laˇ tuˬ yoˬ.’ Iˉsaˍreˍlaˆ chaw htaꞈ sheh kʼai tuˬ ve chaw awˬ hoˉ awˬ suhˉ teˇ gʼaˇ leuˆ yuˬ˗oꞈ tehꞈ Moˉseˍ Yaˬhoˉvaˬ geh lawˬ ve yoˬ. Yaˬhoˉvaˬ yawˇ htaꞈ kʼoˆ piˇ ve, ‘nawˬ Yawˇsuˆ geh kʼai leh yawˇ awˬ hoˉ teˇ gʼaˇ gʼa hpehꞈ tuˬ yoˬ tehꞈ ca kʼoˆ piˇ˗oˆ.’

Moˉseˍ Iˉsaˍreˍlaˆ chaw htaꞈ kʼoˆ piˇ ve, yawˇ suh la paˇ neˇ leh Iˉsaˍreˍlaˆ chaw ka tiꞈ te taˍ ve mvuhˇ miˬ hkʼaw shiˍ loꞈ˗e piˇ tuˬ, Yaˬhoˉvaˬ Yawˇsuˆ htaꞈ leuˆ yuˬ ve yoˬ. Moˉseˍ Yawˇsuˆ htaꞈ kʼoˆ piˇ ve, ‘taˇ kawˆ. Yaˬhoˉvaˬ nawˬ htaꞈ ga laˇ tuˬ yoˬ.’ Oˇ ve hkʼawꞈ nawˉ, maˇ maw maw gaˬ leh Moˉseˍ Neˍbawˇ hkʼaw hkʼoˆ lo taˆ˗e ve yoˬ. Oˇ kaˬ lo Yaˬhoˉvaˬ Aˍbraˍhanˍ, Iˉcaˆ leh Yaˍkoˆ hui htaꞈ ka tiꞈ te piˇ taˍ ve mvuhˇ miˬ Moˉseˍ htaꞈ mawˬ tcuh ve yoˬ. Hkʼe te leh Moˉseˍ a shaꞈ 120 hkʼawꞈ gaˬ leh suh˗e ve yoˬ.

Yaˬhoˉvaˬ Yawˇsuˆ htaꞈ kʼoˆ piˇ ve, ‘nawˬ Yawˇdanˍ iˉ kaˆ lawˬ htaꞈ hkanˍ leh Hkaˍnanˍ mvuhˇ miˬ lo loꞈ˗e loˬ. Ngaˬ Moˉseˍ htaꞈ ga piˇ jaw ve hkʼa shuˍ, ngaˬ nawˬ htaꞈ kaꞈ ga laˇ tuˬ yoˬ. Nawˬ ngaˬ ve awˬ liˇ tawˇ hkawˇ teˇ nyi le le gʼa gʼaw  ve yoˬ. Taˇ kawˆ. Haꞈ hanˉ ve nyi ma cawˬ leh ngaˬ kʼoˆ laˇ ve teˇ ceuˬ le le na yuˬ leh te˗o.’

Yawˇsuˆ chaw jaˆ 2 gʼaˇ htaꞈ Yeˍriˆhkoˇ venˇ lo kʼai tcuh ve yoˬ. Venˇ oˇ ve hkʼaw hpehꞈ la ve awˬ ceuˬ awˬ gʼuˇ suhˍ teˇ lawn hkʼaw mawˬ tuˬ yoˬ. Chaw jaˆ kʼawꞈ la leh Yawˇsuˆ htaꞈ kʼoˆ piˇ ve, chi teˇ hkui Hkaˍnanˍ mvuhˇ miˬ hkʼaw loꞈ˗e tuˬ awˬ yanˇ daꞈ ve yoˬ. Shawˉ pawˍ gaˬ leh Iˉsaˍreˍlaˆ chaw hui ve aˉ po kʼo hpaˆ taˆ˗oˆ tehꞈ Yawˇsuˆ yawˇ hui htaꞈ kʼoˆ piˇ ve yoˬ. Yawˇ lehˬ Iˉsaˍreˍlaˆ chaw awˬ gʼuˇ suhˍ lo Yawˇdanˍ iˉ kaˆ lawˬ lo Paw hkuˇ htaꞈ ka tiꞈ shaˉ caˆ ta kʼoˍ taˆ leh hkanˍ kʼai tcuh ve yoˬ. Oˇ teˇ hkui lehˬ iˉ kaˆ gʼuiˬ dawˇ hehnˇ jaˇ ve yoˬ. Yaꞈ hkʼaˇ, Paw hkuˇ hkui sheh iˉ kaˆ hkʼaw naˆ keu ve teˇ yanˇ, iˉ kaˆ laꞈ haˉ fiˍ kʼai ve yoˬ! Paw hkuˇ iˉ kaˆ awˬ kʼaw ji lo huˉ taˍ leh Iˉsaˍreˍlaˆ chaw teˇ gʼaˇ le le kʼai gʼa ve yoˬ. Chi teˇ pawˆ anˇ tuˬ te ve lehˬ Yaˬhoˉvaˬ laˇ tsuhˇ gʼuiˬ nyi lo te ve awˬ ceuˬ htaꞈ yawˇ hui dawˇ nawˇ ve yoˬ.

Heh puiˉ hkʼaw lo chehˇ ve laiˉ hkʼawꞈ gaˬ peuˬ hkʼawꞈ nawˉ, awˬ leh meuˇ htaˇ Gʼuiˬ sha ka tiꞈ te taˍ ve mvuhˇ miˬ hkʼaw Iˉsaˍreˍlaˆ chaw gʼa loꞈ˗e ve yoˬ. Yawˇ hui ve yehˬ, venˇ, muiˬ caˇ vaˇ caˇ ve, a pehˉ meuˇ hko leh iˉ shiˍ hko gʼa te ve yoˬ. Mvuhˇ miˬ oˇ ve miˬ hkuiˇ daꞈ jaˇ leh nuˇ cuˉ gʼuiˬ leh pehˇ gʼuiˬ maˇ maˇ cawˬ ve yoˬ.