Hasaaetelezi sicaba sa Isilaele ka lilimo zeñata, Mushe naatuha ashwa. Jehova amubulelela kuli: ‘Haki wena yakakenya Maisilaele mwa Naha ya Sepiso. Kono nika kubonisa yona.’ Mushe kiha kupa Jehova kuketa mueteleli yomunca kuli ababalele sicaba. Jehova ali ku yena: ‘Uye ku Joshua, mi umubulelele kuli ki yena yakaetelela sicaba.’

Mushe abulelela sicaba kuli naatuha ashwa, ni kuli Jehova uketile Joshua kuli ki yena yakaetelela sicaba kufitela bakena mwa Naha ya Sepiso. Mushe kihaa li ku Joshua: ‘Usike wasaba. Jehova ukakutusa.’ Hamulaho feela wa fo, Mushe aya fa ngo ya Lilundu la Nebo, ili ko Jehova naamubonisize naha yanaasepisize ku Abrahama, Isaka, ni Jakobo. Mushe naanani lilimo ze 120 hashwa.

Jehova ali ku Joshua: ‘Sila Nuka ya Jordani, mi uye mwa Kanana. Nikakutusa sina feela mone nituselize Mushe. Ubone teñi kuli wabala Mulao waka zazi ni zazi. Usike wasaba. Ube ni bundume. Zamaya mi ueze zenikulaezi kaufela.’

 Joshua aluma matwela bababeli mwa muleneñi wa Jeriko. Mwa likande lelitatama, lukaituta zeñata ka za lika zeneezahezi mwa muleneñi wo. Matwela bao hane bakutile, bato biha kuli neli nako yeswanela ya kuya mwa Kanana. Habusa, Joshua abulelela sicaba mwa mafulo kuli balonge libyana zabona. Cwale aluma baprisita bane bashimbile aleka ya tumelelano kuli baitangete kwa Nuka ya Jordani. Nuka neitezi mezi amañata luli. Kono baprisita basahata feela mwa mezi a nuka yeo, mezi atuhela kububa mi aoma! Baprisita baya fahalaa nuka, mi bayema kufitela sicaba sa Isilaele sisilela mwabuse bwa nuka. Kana munahana kuli makazo yeo neibahupulisize zanaaezize Jehova fa Liwate Lelifubelu?

Kwa mafelelezo, hamulaho wa lilimo zeo kaufela, Maisilaele bafita mwa Naha ya Sepiso. Nebakona kuyaha mandu ni mileneñi. Nebakona kuba ni masimu, masimu a likota za veine, ni masimu a likota zebeya miselo. Neli naha mokububa mabisi ni linosi.