Musa koro ne chiegni tho bang’ tayo Jo-Israel kuom higni mang’eny. Jehova nonyise niya: ‘In ok ibi tero Jo-Israel nyaka e piny ma ne asingonegi. Kata kamano, abiro yieni neno pinyno gi chien.’ Musa nokwayo Jehova mondo Jehova oyier ng’at machielo ma ne dhi tayo Jo-Israel. Jehova nodwoke kama: ‘Dhi ir Joshua, kendo inyise ni en e ma ayiere.’

Musa ne onyiso oganda ni ne ochiegni tho, kendo ne onyisogi ni Jehova ne oseyiero Joshua mondo e ma obi otagi nyaka gidonj e Piny ma Nosingi. Kae to Musa nonyiso Joshua kama: ‘Kik iluor. Jehova biro konyi.’ Mapiyo bang’ mano, Musa ne odhi e wi Got Nebo. Ka en kanyo, Jehova ne osiemone piny ma ne osingo ne Ibrahim, Isaka, gi Jakobo. Kae to Musa ne otho ka ojahigni 120.

Jehova nonyiso Joshua niya: ‘Ng’aduru Aora Jordan, kendo udonj e piny Kanaan. Abiro konyi mana kaka nakonyo Musa. Ne ni isomo Chikena pile ka pile. Kik iluor. Bed gi chir. Dhiyo, mondo itim duto ma achikoi.’

 Joshua nooro chwo moko ariyo mondo odhi onon taon mar Jeriko. E sigana ma luwo ma, wabiro puonjore mang’eny e wi gik ma ne otimore e taon mar Jeriko. Ka ne giduogo, ne giwacho ni mano ne en kinde ma ber gi donjo Kanaan. Kinyne, Joshua ne onyiso oganda Jo-Israel mondo gichan gigegi mondo gichak wuoth. Kae to nooro jodolo ma noting’o sandug singruok mondo otel nyimgi nyaka Aora Jordan. Aorano ne opong’ ahinya chieng’no. Kata kamano, ka ne jodolo onyono anyona pi aorano ni i, pi nong’adore, ma konchiel omol ma odhi te. Jodologo ne owuotho nyaka e chuny aorano ma gichung’ kanyo nyaka Jo-Israel duto ne okalo nyaka loka machielo. Donge nyalo bedo ni hononi noparonegi gima Jehova notimo e Nam Makwar?

Gikone, bang’ bedo e thim kuom higni mang’enygo te, Jo-Israel koro nodonjo e Piny ma Nosingnegi. Koro ne ginyalo gero utegi kod taonde, kendo ne ginyalo pidho cham kod olembe. Pinyno nopong’ gi chiemo kod gik mimadho mang’eny. Mano e momiyo ne iluonge ni piny mopong’ gi chak kod mor kich.