Otoq kubʼ nej Moisés nimku abʼqʼi kywitz aj Israel, ex chʼixtoq tpon ambʼil tuʼn tkyim. Tzaj tqʼamaʼn Jehová jlu te: «Nya aya kʼokex qʼiʼn kye aj Israel toj Txʼotxʼ Tziyen maj wuʼne kye. Oʼkx waje tuʼn tok tkeʼyina txʼotxʼ lu». Xitzun tqanin Moisés te Jehová tuʼn tjaw tjyoʼn juntl nejenel tuʼn tkubʼ nej kywitz aj Israel. Tzaj ttzaqʼweʼn Jehová jlu te: «Yolina tukʼil Josué ex qʼamanxa te qa a ma jaw njyoʼne».

Xi tqʼamaʼn Moisés kye aj Israel qa chʼixtoq tkyim ex qa otoq jaw tjyoʼn Jehová Josué tuʼn tkubʼ nej kywitz tuʼntzun kyokx toj Txʼotxʼ Tziyen maj. Xitzun tqʼamaʼn Moisés jlu te Josué: «Miʼn tzaj xobʼa. Ok tzul onina tuʼn Jehová». Tej tikʼ chʼintl ambʼil, jax Moisés tzmax twi witz Nebo. Atztzun xi tyekʼin Jehová aju txʼotxʼ otoq txi ttziyen te Abrahán, Isaac ex Jacob. Qʼiʼntoq 120 abʼqʼi tuʼn Moisés tej tkyim.

Tzaj tqʼamaʼn Jehová jlu te Josué: «Kyikʼxe toj nim aʼ Jordán ex kyokxe toj Canaán. Ok chin onile tiʼja ik tzeʼn in onine tiʼj Moisés. Miʼn tzʼel naj tiʼj tkʼuʼja tuʼn tuʼjina kyiʼj nkawbʼile tkyaqil qʼij. Miʼn tzaj xobʼa, tenx tipuna. Bʼinchama tkyaqilju ma txi nqʼamaʼne teya».

 Xi tsamaʼn Josué kabʼe xjal tuʼn tbʼaj keʼyin tnam Jericó. Toj juntl txʼolbʼabʼil ok kʼelel qnikʼ tiʼj junjuntl tiʼ ikʼ atztzun. Tej kymeltzʼaj qeju xjal ex samaʼn toj Jericó, tzaj kyqʼamaʼn qa jun tbʼanel ambʼil jlu tuʼn kyokx toj Canaán. Toj juntl qʼij, xi tqʼamaʼn Josué kye aj Israel tuʼn tbʼaj kybʼinchaʼn kyten tuʼn kyikʼ bʼet. Tnejel i ex tsamaʼn qe pal tuʼn kykuʼx toj nim aʼ Jordán, aʼyeju qʼiʼn kajon kʼubʼel Ley kyuʼn. Otoq jaw chʼiyxix aʼ, noqtzun tuʼnj, tej kykuʼpen kyqan pal toj aʼ, mintiʼtl bʼet ex kubʼ tzqij. E ikʼxtzun bʼet qe pal toj tzqij txʼotxʼ toj aʼ. Tej kypon toj tmij, moqa toj tnikʼjan aʼ, e kyaj weʼ tzmaxi tej kyikʼx kykyaqil aj Israel tjlajxi aʼ. Tej tok kyqʼoʼn kywitz tiʼj bʼinchbʼen nim tipumal lu, tzeʼn teya toj twitz, ¿tzajpetzulo kynaʼn aju bʼant tuʼn Jehová toj mar Rojo?

Tej kyikʼ qeju nimku abʼqʼi lu, e pontzun aj Israel toj Txʼotxʼ Tziyen maj. Toj ambʼil aju, jakutoq jaw kybʼinchaʼn qe ja ex qe tnam. Jakutoq kubʼ kyaqʼunan txʼotxʼ, jakutoq kux kyawaʼn tqan uva, ex jakutoq ten tqan kyawal. Ax tok, attoq lech ex miel toj txʼotxʼ lu.