Moisés kiixyekanka xolal Israel miak xiujmej, uan axkan yaya momikilitiya. Jiova kiluij: “Amo tejua tikinixyekanas israelitas itech Tal tein nimotenkauak nikinmakas. Sayoj ke nimitskauati xikita tal”. Ompa, Moisés kitajtanij Jiova maj kiixpejpenani se yankuik taixyekankej akin kiyekpiaskia xolal. Jiova kinankilij: “Xitajto iuan Josué uan xikilui ke yejua nikixpejpena”.

Moisés kinmelauilij israelitas ke yejua yaya momikilitiya uan ke Jiova kiixpejpenka Josué maj kinixyekana itech Tal tein motenkaujka kinmakas. Ompa Moisés kiluij Josué: “Amo ximoui. Jiova mitspaleuis”. Tepitsin satepan, Moisés pankisak hasta ikuapan tepet Nebo. Keman ompa yetoya, Jiova kinextilij tal tein motenkaujka kimakas Abrahán, Isaac uan Jacob. Moisés kipiaya 120 xiujmej keman momikilij.

Jiova kiluij Josué: “Xikpanaui ueyiat Jordán uan xikalaki Canaán. Nejua nimitspaleuis, ijkon kemej nikpaleuij Moisés. Amo xikelkaua mojmostaj tikixtajtoltis noTanauatil. Amo ximoui, moneki tiyeski tiyolchikauak. Xiyouj uan xikchiua nochi tein nimitsnauatij”.

 Josué kintitanik ome tapijpianij itech altepet Jericó. Itech okse tamachtilis tikitaskej okachiok tein panok ompa. Keman tapijpianij mokepkej, kijtojkej ke ueliskiaya kalakiskej Canaán. Mostika, Josué kiniluij israelitas maj kiajokuinij takenkalmej. Yekinika, kintitanik itech ueyiat Jordán tiopixkamej akin kiuikayaj arca tein kinelnamiktiaya netenkaualis. Tel miak at motalojtoya, sayoj ke niman keman tiopixkamej taksakej itech at, ueyiat motsakuilij uan uakik. Ompa tiopixkamej ojtokakej itech tal uakik. Keman ajsikej tatajkoyampa, ompa motsakuilijkej hasta keman nochi xolal Israel panok oksekopa. Keman kiitakej nejin ueyi tachiualis, ¿tiknemilia ke kielnamikkej tein Jiova kichiuak itech ueyiat Chichiltik?

Satepan ke panokej miak xiujmej, israelitas ajsikej itech Tal tein Dios motenkaujka kinmakas. Axkan ueliskiajya kichijchiuaskej kalmej uan xolalmej. Ueliskiaj kitokaskej tataman takilomej. Kemej onkaya miak taman tein kuali tein ueliskia se kikuas uan se tayis, moijtouaya ke katka se tal kampa meyaya leche uan nekti.