Moisés miak xiuitl okinyekanki israelitas pero yimikiskia, ik non, Jehová okilui: “Te amo tikinuikas israelitas itech tlali tlen yonikijto nikinmakas. Pero nimitskauilis xikita tlali”. Moisés okilui Jehová ma kipejpena akin kinyekanaskia uan kinmaluiskia israelitas. Jehová okilui: “Ximotlapoui iuan Josué uan xikilui ye onikpejpenki”.

Moisés okinmilui israelitas ye yimikiskia uan Jehová okipejpenki Josué para ma kinuika itech tlali tlen Jehová okijto kinmakaskia. Ijkuakon, Moisés okilui Josué: “Amo ximomojti, Jehová mitspaleuis”. Satepan, Moisés otlejkok ipan tepetl Nebo. Ompa Jehová okititi tlali tlen okilui kimakaskia Abrahán, Isaac uan Jacob. Moisés okipiaya 120 xiuitl ijkuak omikik.

Jehová okilui Josué: “Xikpanoui aueyatl Jordán uan xikalaki Canaán. Ne nimitspaleuis ijkon ken onikpaleui Moisés. Mojmostla xiktlajtolti noTlanauatil. Amo ximomojti, moneki tiyetos tiyolchikauak. Xio uan xikchiua nochi tlen yonimitsnauati”.

 Josué okintitlanki ome tlakamej ichtaka ma tlachiatij Jericó. Itech okse tlamachtil okachi timomachtiskej tlen ompa opanok. Ijkuak omokuepatoj, okijtojkej uelis yaskiaj Canaán. Mostlatika, Josué okinnauati israelitas ma motlaololilikan. Achto okintitlanki teopixkej tlen okiuikayaj arca itech tlajtolsenkaualistli ma kipanouikan aueyatl Jordán. Aueyatl sapanoa omoskalti, pero ijkuak teopixkej omoketskej ijtik atl, aueyatl omoketski uan ouaki. Ijkuakon, teopixkej opanokej kanin opanoaya aueyatl. Ijkuak oajsitoj itlajkotia, ompa omokajkej hasta ijkuak nochtin israelitas opanokej. ¿Tikneltoka okilnamikej tlen Jehová okichi itech mar Rojo ijkuak okitakej nin milagro?

Ijkuakon, israelitas oajsitoj itech tlali tlen Jehová okijto kinmakaskia. Ompa yiueliskia kinchijchiuaskiaj kalmej uan altepemej. Noijki yiueliskia kitokaskiaj miak tlamantli ken uvas uan okseki tlakilotl. Itech non tlali okatka leche uan neujtli.