UMosi wayekhokhele ama-Israyeli okwesikhathi eside futhi wayesezakufa. UJehova wathi kuye: ‘Kawusoze uwangenise ama-Israyeli eLizweni Lesithembiso, kodwa ngizakutshengisa ilizwe lakhona.’ UMosi wasecela uJehova ukuthi akhethe umuntu owayezakhokhela ama-Israyeli. UJehova wathi kuye: ‘Yana kuJoshuwa umtshele ukuthi nguye engimkhethileyo.’

UMosi watshela ama-Israyeli ukuthi wayesezakufa lokuthi uJehova wayekhethe uJoshuwa ukuthi awangenise elizweni ayewathembise lona. UMosi wathi kuJoshuwa: ‘Ungesabi, uJehova uzakuncedisa.’ Eqeda ukutsho lokho uMosi wakhwela entabeni iNebho. UJehova wamtshengisa ilizwe ayelithembise u-Abhrahama, u-Isaka loJakhobe. UMosi wafa eleminyaka engu-120.

UJehova wathi kuJoshuwa: ‘Chapha uMfula uJodani uye eKhenani. Ngizakuncedisa njengoba ngancedisa uMosi. Bala imithetho yami nsukuzonke. Ungesabi. Woba lesibindi. Hamba uyekwenza engikuthume khona.’

 UJoshuwa wathuma izinhloli ezimbili edolobheni laseJerikho. Sizafunda ngokunye okwenzakala eJerikho esifundweni esilandelayo. Izinhloli lezi zafika zatshela uJoshuwa ukuthi kwakuyisikhathi esihle sokuthi ama-Israyeli angene eKhenani. Ngelanga elalandelayo uJoshuwa watshela ama-Israyeli ukuthi alungiselele ukusuka lapho ayekhona. Watshela abaphristi ababethwele ibhokisi lesivumelwano ukuthi bahambe phambi kwabantu baye emfuleni uJodani. Umfula wawugcwele, kodwa kwathi izinyawo zabaphristi zithinta amanzi, umfula wema ukugeleza njalo amanzi ehlukaniswa. Abaphristi bangena emfuleni bayakuma phakathi kwawo ama-Israyeli aze achapha. Ubona angani isimangaliso leso sawakhumbuza yini ama-Israyeli lokho uJehova akwenzayo eLwandle Olubomvu?

Ama-Israyeli ayeseze angena elizweni ayelithenjisiwe. Ayesengazakhela izindlu lamadolobho. Ayengalima futhi ahlanyele izihlahla zezithelo. Kwakulilizwe elalilochago loluju olunengi.