Bwanyima ya Musa kwebembera Abaisraeli kumara emyaka mingi, akaba ari haihi kufa. Yehova akamugira ati: ‘Tiiwe oriihitsya Abaisraeli omu Nsi Eyaraganisiibwe. Kwonka niinyija kukureka oreebe egyo nsi.’ Musa akashaba Yehova kutoorana omwebembezi musya oraayebembere abantu. Yehova akamugira ati: ‘Gambira Yoshua ngu niwe ntooraine.’

Musa akagambira Abaisraeli ngu akaba ari haihi kufa kandi ngu Yehova akaba atooraine Yoshua kuba niwe yaabeebembera kubahitsya omu Nsi Eyaraganisiibwe. Musa akagambira Yoshua ati: ‘Otatiina. Yehova naija kukuhwera.’ Bwanyima, Musa akainamuka aha Rushozi Neebo, ahu Yehova yaamworekiire ensi ei yaaraganiise Abrahamu, Isaaka, na Yakobo. Musa akafa aine emyaka 120.

Yehova akagambira Yoshua ati: ‘Yambuka Omugyera Yorudani, oze Kanaani. Niinyija kukuhwera nk’oku naahwereire Musa. Ogume oshome Ebiragiro byangye buri izooba. Otatiina. Ba ow’amaani. Gyenda okore ebi naakuragiira kukora.’

 Yoshua akoheereza entatsi ibiri omu rurembo Yeriko. Omu kitebyo ekirikurataho, nitwija kwega bingi ebyabaireho. Ku baagarukire, bakagambira Yoshua ngu bukaba buri obwire burungi bw’okuza Kanaani. Ekiro ekyakuratsireho, Yoshua akagambira Abaisraeli kutebeekanisa ebintu byabo. Bwanyima akoohereza abanyamurwa abaabaire nibaheka eshanduukye y’endagano kuza aha Mugyera Yorudani. Omugyera gukaba gwijwire amaizi. Kwonka ahonaaho abanyamurwa ku baaribatsire omu maizi, amaizi gakatuuba. Abanyamurwa baakemerera ahagati y’omugyera kandi Abaisraeli boona bakambuka. Noogira ngu eky’okutangaaza eki kikabaijutsya eki Yehova yaabaire yaakozire aha Nyanja Erikutukura?

Bwanyima y’emyaka egyo yoona, Abaisraeli bakahika omu Nsi Eyaaraganisiibwe. Bakaba nibabaasa kwombeka amaju n’endembo. Kandi bakaba nibabaasa n’okuhinga emisiri y’emizabibu, n’ebindi. Ekaba eri ensi y’amate n’obwoki.