Moses o sun emọ Israel ẹgbukpe buebun ne, ọ jeghwai ho omamọ ne. Jehova nọ ta rẹn Moses: ‘Orhiẹ owẹwẹ yi ne suẹn emọ Israel ruẹ Otọre Ive na-a. Ọrẹn, wu na mẹrẹn otọre na.’ Moses nọ ta rẹn i Jehova nọ djẹ ohworho ọrọrọ ro no sun ihworho na. Jehova nọ ta riẹn: ‘Bru i Joshua, ne wu ta riẹn taghene ọye yi mi djẹre.’

Moses nọ ta rẹn agbamwa Israel taghene ọye ọ guọlọ hwuẹ ne, Jehova ọ jeghwai djẹ ohworho ro no sun aye riẹ Otọre Ive na ne. Moses nọ ta rẹn i Joshua: ‘Wu vwa zofẹ-ẹn. Jehova ọnọ ha userhumu wẹn.’ Ọke oru, Moses no riẹ oberun Ugbenu i Nebo, avwaye yi Jehova o dje otọre ro veri harẹn Abraham, Isaac, ọrhẹ Jacob riẹn. Ẹgbukpe 120 yi Moses ọ havwọ ọke ro hwu.

Jehova nọ ta rẹn i Joshua: ‘Are i davrẹn Urhie i Jordan riẹ ẹkwotọre i Canaan. Mi na ha userhumu wẹn jerẹ oborẹ mi ha userhumu rẹn Moses. Se Urhi mẹ kẹdẹkẹdẹ. Wu vwa zofẹ-ẹn. Fiudugbere. Nyarhẹn ye ru oborẹ mi ta wẹn.’

 Joshua no dje idọrhẹ awanva riẹ amwa i Jericho. Urhomu-ẹmro rọ ha kpahen ọnana ọnọ ta rẹn ọwan kpahen oborẹ ọ phia rẹn idọrhẹ awanva na oboran. Ọke aye a ghwẹrioma rhe, aye ni tare taghene aye ina sabu ruẹ i Canaan. Ẹdẹ ọreva ye, Joshua nọ ta rẹn aye ephian nẹ aye i mwuegbe. Nọ ta rẹn irherẹn ra kpare owọ ọphọ na nẹ aye i kpare owọ ọphọ na riẹ Urhie i Jordan. Urhie na ọ zẹ. Ọrẹn, ogege aghwẹ irherẹn ri kpare owọ ọphọ na e te ame na, urhie na nọ dobọji, no mwonrin! Irherẹn na ni ruẹ erhẹrhẹ urhie na, aye ni mevi avwaye bọmọke ọsoso agbamwa Israel a nyavrẹn. Wu rorori taghene igbevwunu ọnana ọ karorhọ aye oborẹ i Jehova o ruru uvuẹn Urhie i Red na?

Emọ Israel i vabu te Otọre Ive na ne, dedevwo ẹgbukpe buebun i nyavrẹn ne. Vwarana, aye ina sabu bọn eghwa irhorhomu. Aye ina sabu wọ i vine, apple ọrhẹ ewawọ erọrọ rhẹ ikebi aye. Ọnana ghini otọre rọ vuọnren rhẹ imiki ọrhẹ amiahon.