Ri Moisés kʼi junabʼ chik ukʼamom kibʼe ri tinamit Israel, xuqujeʼ kimik ri ukʼaslemal xaq jubʼiqʼ kraj kkʼisik. Jehová xubʼij che: «At ta riʼ ri winaq che kkʼamow bʼi ri israelitas pa ri ulew che tzujum. Are kʼu kinya bʼe chawe che kawil ri ulew». Tekʼuriʼ, Moisés xutaʼ che ri Jehová che kuchaʼ jun kʼakʼ ajkʼamal bʼe che kuchajij ri tinamit. Jehová xubʼij che: «Chattzijon rukʼ Josué xuqujeʼ chabʼij che, che are ri nuchaʼom».

Moisés xubʼij che ri tinamit xa jubʼiqʼ chi kraj kkamik xuqujeʼ che Jehová xuchaʼ ri Josué rech kukʼam kibʼe rech keʼok pa ri ulew che tzujum chke. Rumal laʼ Moisés xubʼij che Josué: «Kaxibʼij ta awibʼ. Jehová katutoʼ». Qʼaxinaq jubʼiqʼ tiempo, Moisés xpaqiʼ kʼa pa uwiʼ ri juyubʼ Nebo. Chilaʼ, Jehová xukʼut ri ulew che xutzujuj che Abrahán, Isaac xuqujeʼ Jacob. Moisés kʼo 120 ujunabʼ are chiʼ xkamik.

Jehová xubʼij che Josué: «Chatqʼax pa ri nimaʼ Jordán xuqujeʼ chatok pa Canaán. In katintoʼ, junam che xintoʼ ri Moisés. Ksach ta chawe kasikʼij uwach ri nutaqanik ronojel taq qʼij. Kaxibʼij ta awibʼ, rajawaxik kubʼan ko ri awanimaʼ. Jat xuqujeʼ chabʼanaʼ ronojel ri at nutaqom wi».

 Josué xeʼutaq bʼi kebʼ achijabʼ rech kekila ri tinamit Jericó. Pa ri jun chik bʼantajik kqetaʼmaj más chrij ri xkʼulmataj chilaʼ. Are chiʼ ri achijabʼ xetzalij lo Jericó, xkibʼij che are utz keʼok pa Canaán. Che ri jun qʼij chik, Josué xubʼij che ri tinamit che kuwalajisaj ronojel ri jastaq re. Nabʼe xeʼutaq bʼi ri e ajkojol tabʼal toqʼobʼ che kikʼamom bʼi ri Arca rech ri pacto pa ri nimaʼ Jordán. Ri nimaʼ sibʼalaj nojinaq, are kʼu xaq xiw xtakʼiʼ ri kaqan chupam ri jaʼ, ri jaʼ xbʼin ta chik xuqujeʼ xchaqijik. Are chiʼ xeʼopan pa ri unikʼajil, xekʼojiʼ chilaʼ kʼa chiʼ ronojel ri tinamit re Israel xeqʼax pa ri jun chik uchiʼ ri jaʼ. Are chiʼ xkil wajun milagro riʼ, ¿la kachomaj che xnaʼtaj chke ri xubʼan ri Jehová pa ri mar Rojo?

Chiʼ qʼaxinaq chi ronojel ri e junabʼ riʼ, kʼisbʼal re xeʼopan pa ri ulew tzujum chke. Kimik kekunik kkibʼan ja xuqujeʼ e tinamit. Kekunik kkitik ri ulew, kkitik uva xuqujeʼ nikʼaj chik tikoʼn. Pa ri ulew riʼ kʼo leche xuqujeʼ rax kabʼ.