Moisesca achca huatacunatami Israel llajtataca pushashca carca. Cunanca ñallami huañugrirca. Diosca Moisestaca, ‘israelitacunataca ñuca cushca nishca llajtamanca canca mana yaicuchinguichu. Pero cambaj ñahuihuan ricuchunmi saquisha’ nirca. Chaipimi Moisesca Diostaca israelitacunata cuidachun shuj mushuj pushajta agllachun mañarca. Diosca, ‘Josuehuan parlanacui. Paitami agllashcani’ nircami.

Moisesca israelitacunamanca, ‘ñucaca ñallami huañusha. Diosca Josuetami pai cusha nishca llajtaman pushachun agllashca’ nircami. Shinallataj Josuetaca, ‘Diosca canhuanmi canga. Ama manchanguichu’ nircami. Asha tiempo qꞌuipaca Moisesca Nebo urcumanmi huichiyarca. Chai urcumantami Jehová Diosca Abrahamman Isaacman Jacobman cusha nishca allpata paiman ricuchirca. Moisesca 120 huatacunata charishpami huañurca.

Diosca Josuetaca, ‘Jordán yacuta chꞌimbashpa Canaán llajtaman yaicui. Moiseshuan cashca shinallatajmi canhuanpish casha. Ama manchanguichu. Ñuca mandashcataca cada punlla leyinataca amataj saquingui. Tucui ñuca imalla mandashcacunata rurangui’ nircami.

 Josueca Jericó llajtata purij shinallami ricunaman ishqui runacunata cacharca. Catij leccionpimi chaipi ima tucushcataca yachashun. Chai ishqui runacuna Jericomanta tigramushpaca Canaanmanca yaicunallami canchij nircacunami. Cayandij punllaca Josueca israelitacunataca carpa huasicunata pascaichij ringapaj nircami. Puntaca Dioshuan ari ninacushca arcata apashpa rij sacerdotecunatami Jordán yacuman cacharca. Chai yacuca jundami carca. Pero sacerdotecuna yacupi sarujpica chaquirircami. Qꞌuipaca sacerdotecunaca yacu chaquirishca pambata purishpami chaupicama rishpa chaipi saquirircacuna. Chaimi tucui israelitacuna caishuj ladoman pasarcacuna. Chai milagrota ricushpaca ¿Puca cuchapi Dios milagrota rurashcata yuyarishcacunachu canga?

Achca huatacunapimi israelitacunaca Dios cusha nishca allpaman chayarcacuna. Chaipica paicunapaj huasicunatami shayachi tucurcacuna. Chashnami pueblocuna tiyana carca. Chashnallataj uvacunata, granocunatami tarpui pudircacuna. Chai allpapica lechepish mielpishmi tiyarca.