Moisesqa achka watakunañam Israel runakunata pusarqa. Wañuypa patanpiña kachkaptinmi Jehova Dios nirqa: “Israel runakunataqa manam qamchu qunay allpamanqa chayachinki, ichaqa riqsinaykipaqmi chay allpata qawachisqayki”, nispa. Chaymi Moisesqa Diosta nirqa huktaña akllananpaq. Jehova Diosñataqmi nirqa: “Josueyta nimuy payña akllasqay kasqanmanta”, nispa.

Moisesmi runakunaman willarqa wañukuptin Josueyña pusaqninku kananmanta. Nirqataqmi kikin Jehova Dios akllasqanmantapas, hinaspam Josueyta nirqa: “Ama manchakuychu. Jehova Diosmi yanapasunki”, nispa. Chaymanta qipatam Jehova Diosqa Moisesta Nebo urquman pusaspan qawachirqa Abrahanpa, Isaacpa hinaspa Jacobpa mirayninkunaman qunan allpata. Moisesqa 120 watanpiñam wañukurqa.

Jehova Diosmi Josueyta nirqa: “Jordan mayuta chimpaspa Canaan allpaman yaykuy. Moisesta hinam qamtapas yanapasqayki. Kamachikuy qusqaykunatayá sapa punchaw leey. Amataq manchakuychu. Qarinchakuspayá kasukuy”, nispa.

 Josueymi Jerico llaqtaman iskay watiqaqkunata kacharqa. Chay iskay watiqaqkunam kutiramuspanku Israel runakunata kallpancharqaku chay allpaman yaykunankupaq. Paqarinnintinmi Josueyqa nirqa allichakunankupaq. Puntataqa sacerdotekunam acuerdo ruwana baulta aparikuspanku Jordan mayuman yaykuykurqaku. Paykuna mayuta saruykuptinkum chaylla chakirurqa, hinaspapas mayupa chawpinpi sayanankukamam Israel runakuna chimparqaku. Chaywanmi yuyarirqaku Puka lamar quchatapas Jehova Dios kicharusqanmanta.

Chayraqmi Israel runakunaqa rinanku allpaman chayarurqaku. Chayaruspankuqa wasinkutañam sumaqta ruwarqaku, hinaspapas chakrankupim tarpukurqaku. Chay allpaqa tukuy imapa kananmi karqa.