Moisesqa askha watakunañan Israel llaqtata pusaran, kunanmi ichaqa wañupunanpaqña kasharan. Diosmi payta niran: “Manan qanchu llaqtaytaqa prometesqay allpaman jaykuchinki. Chaywanpas rikuchisqaykin chay allpata”, nispa. Jinan Moisesqa Diosta valekuran juj runata ajllananpaq, chaymi Jehová Diosqa Josueta ajllaran Israel llaqtata pusarinanpaq.

Moisesmi llaqtata niran: “Wañupusaqñan, Jehová Diosmi Josueta ajllan prometesqan allpaman pusanasuykichispaq”, nispa. Josuetataq niran: “Ama manchakuychu, Diosmi yanapasunki”, nispa. Chay qhepallamanmi Moisesqa Nebo orqoman wicharan. Chaymantapachan Diosqa rikuchiran Abrahanman, Isaacman, Jacobmanpas prometesqan allpata. Jinan Moisesqa 120 watanpi kashaspa wañupuran.

Jehová Diosmi Josueta niran: “Jordán mayuta chimpaspa Canaanman jaykuy. Moisesta jinan yanapasayki. Sapa p’unchay kamachikuyniykunata leey. Ama manchakuychu, llapa kamachisqayta ruway”, nispa.

 Josuemi iskay qharikunata Jericó llaqtaman kacharan qhawamunankupaq. Qatimuq willakuypin astawanraq chaymanta yachasun. Jericomanta kutimuspankun chay runakunaqa Josueman willaranku Canaanman jaykunankupaq allin kashasqanta. Qhepa p’unchaytaq Josueqa Israel runakunata kamachiran alistakunankupaq. Ñaupaqtaqa rimanakuy arcata q’epiq sacerdotekunatan kamachiran mayuman jaykunankupaq. Mayuqa junt’an kasharan, ichaqa sacerdotekunaq chakin unuta saruyta qallariqtinkun unuqa ch’akipuran. Jinan sacerdotekunaqa mayuq chaupinkama riranku, chaypitaq sayaranku llapa Israel runakuna chimpanankukama. Chay milagrota rikuspa, ¿yuyarinkumanchu Israel runakuna karan Jehová Dios Puka qochapi milagro ruwasqanta?

Chay qhepamanmi Israel runakunaqa Diospa prometesqan allpaman jaykuranku. Chaypiqa atiranku wasinku ruwakuyta, chajrakunatapas llank’ayta. Chay allpapiqa askhan mijuykuna kaq, chaymi niqku “lecheyoq mielniyoq allpa” nispa.