Ashtaca huatacunatami Moisesca israelitacunata ñaupaman pusharca. Pai ña ruculla caimandami huañuna punlla chayagrijurca. Chaimi Jehová Diosca Moisestaca nirca: Israelitacunataca ñuca carasha nishca alpamanga na pushagringuichu. Shinapash israelitacunaman carasha nishca alpata can ricuchun saquishami nishpa. Chaimi Moisesca Jehovata cashna nirca: “Tandanajushca israelcunata pushachun, shuj runata churapairi” nishpa. Shina nijpimi Jehová Diosca nirca: ‘Josuemi ñuca espirituta charin, paita pushamushpa paipa umapi canba maquita churai’ nishpa.

Moisesca israelitacunataca nircami: Ñucaca ñallami huañusha. Chaimi Jehová Diosca cangunata Canaán alpaman pushachun Josueta agllashca nishpa. Shinallata Moisesca Josuetaca nircami: “Ama manllaichu”. Jehová Diosca “candaca napacha saquingachu” nishpa. Asha tiempo jipaca Moisesca ‘Nebo shuti urcumanmi vichai rirca’. Chaipimi Jehová Diosca ‘Abrahanman, Isaacman, Jacobman carasha nishpa juramentushca llactata’ ricuchirca. Moisesca 120 huatacunata charishpami huañurca.

Jehová Diosca Josuetaca nircami: “Cunanga, cambash tucui cai gentecunapash jatarishpa israelcunaman ñuca carashca llactaman Jordan yacuta chimbashpa richilla”. Moisesta ayudashca shinami candapash ayudasha. Shinallata “cai libropi mandashcata liinataca ima horapash na saquinachu cangui”. Imatapash na  manllashpa, ñaupamanmi catina cangui. Ñuca mandashcatapash tucuita rurashpa catingui nishpa.

Josueca ishcai jaricunatami Jericó llactata ricuchun cacharca. Chaitaca chaishuj capitulopimi yachajushun. Chai ishcai jaricuna Jericó llactamanda tigramushpaca nircami, Canaán llactaman yaicungapaca cunanmi ali can nishpa. Chaimi cayandi punllaca Josueca israelitacunataca carpa huasicunata alsaichi nishpa mandarca. Pundapica sacerdotecunatami Jordán yacuman Arca del pactota apaichi nirca. Jordan yacu junda junda cajpipash sacerdotecuna chai yacupi shayarijpica yacuca chaquirircallami. Chaimi sacerdotecunaca yacu chaquishca chaupicaman rishpa tucuilla israelitacuna yacuta chimbangacaman shinlli shayanajurca. Imata yuyangui, chaita ricushpaca israelitacunaca Jehová Dios ¿Mar Rojopi rurashca milagrota yarircacha?

Ashtaca huatacuna jipami, israelitacunaca Jehová Dios carasha nishca alpaman chayarca. Ña chaiman chayashpaca pueblocunata, huasicunatami rurana carca. Shinallata uvascunata, imacunatapash tarpushpa, cosechashpami causana carca. Chai llactapica lechepash, mielpashmi tiarca.