O Mojsije beršencar vodindža e Izraelcen, ama akana phurilo hem alo ko krajo ando po dživdipe. O Jehova phendža ljese: „Tu na ka khuve e Izraelcencar ki Obećimi phuv. Ama, ka mukhav tut te dikhe la.“ Palo odova, o Mojsije rodindža ando Jehova te birini jekhe neve manuše kova ka vodini e narodo. O Jehova phendža ljese: „Dža ko Isus Navin hem phen ljese so ov ka vodini e narodo.“

O Mojsije phendža e narodose so pana hari ka merel hem so o Jehova birindža e Isuse Navine te vodini ljen ki Obećimi phuv. Palo odova, o Mojsije phendža e Isuse Navinese: „Ma dara. O Jehova ka pomožini tut.“ Palo disavo vreme, o Mojsije ukljindža ki planina Navav hem odothar o Jehova mothovdža ljese i Obećimi phuv koja obećindža e Avrahamese, e Isakese hem e Jakovese. O Mojsije hine lje 120 berš ked mulo.

O Jehova phendža e Isuse Navinese: „Nakh i reka Jordan hem khuv ki phuv Hanan. Me ka pomožinav tut, isto sar so pomožindžum e Mojsijese. Svako dive čitin mo Zakon. Ma dara hem ov hrabro. Dža hem čer odova so zapovedindžum tuče.“

 O Isus Navin bičhaldža duj uhodija ki diz Jerihon. Ki aver lekcija ka dikha diso pobuter ando odova so ulo uduri. Ked irindže pe o uhodija, on vačerdže so o narodo šaj te džal te osvojini i phuv Hanan. Tajsato dive, o Isus Navin phendža e Izraelcendže te čeden peklje šatorija hem te podžinen. Tegani on mukhlje prvo e sveštenikonen so igardže o kovčeg ando savez te džan ki reka Jordan. Ko odova vreme ando berš, ki reka hine but pani. Ama, samo so o sveštenikija čhivdže po pro ko pani, o pani šučilo! Tegani o sveštenikija dželje ko maškar andi reka so šučilji hem uduri terdilje sa dži o Izraelcija na nakhlje ki aver strana. So mislineja, da li akava čudo setinčerdža ljen ko čudo so čerdža o Jehova ko Crveno more?

Hem ače, palo sa odobor berša, o Izraelcija konačno reslje ki Obećimi phuv. Odothe šaj hine te čeren pese čhera hem dizja, te ovel ljen njive, vinogradija hem te sadinen voće hem povrće. Odija phuv hine but šukar hem o manuša hine ljen šuže buča hajbase hem pijbase. Odoljese, olače vačeri pe soj tani phuv kuri thavdela avdžin hem thud.