Muse Israeelete manna lowo diro massagi gedensaanni geedhi. Hakkiinni Yihowa Muse togo yii: ‘Israeelete manna Hexxote Gobba haadhe haˈrattohu diateeti. Kayinni hattee gobba laˈˈatto gede fajjeemmohe.’ Muse Yihowa Israeele massagannoha haaro massagaancho dooranno gede xaˈmiˈri. Yihowa Muse togo yii: ‘Iyyaasuwa marte, iso massagaancho asse dooroommota kulisi.’

Muse Israeelete dagara isi mulenni reyannota kulinsa; hattono Yihowa insa Hexxote Gobba haaˈre haˈranno gede Iyyaasu doorinota kulino. Muse Iyyaasu woyite togo yii: ‘Yihowa kaaˈlannohena waajjitooti.’ Shiima yanna gedensaanni Muse Nebo yinanni ilaali birxe fuli; hakkiicho Yihowa Abirihaamira, Yisihaaqiranna Yaiqoobira eemmoˈne yiino gobba leellishisi. Muse 120 dirisinni reyino.

Yihowa Iyyaasu togo yii: ‘Xa kaˈine Yordaanoosi Laga tayissine saˈine Kanaani gobba hadhe. Muse kaaˈlummonte gede ateno kaaˈleemmohe. Seeraˈya barru baala nabbawi. Waajjitooti. Jawaati. Haˈratto darga baalaho ani assi yeemmohere calla assi.’

 Iyyaasu Iyyaarkote katama qottanno gede lame qotaano soyi. Aante noo xaggera hakko mayi ikkinoro lende ronseemmo. Insa Iyyaarkote kataminni higgu woyite, hatti yanna Kanaani gobba haˈrate dancha ikkitinota coyidhino. Layinki barra, Iyyaasu Israeelete daga dunkaanansa adhite hadhanno gede kulinsa. Hakkiinni Iyyaasu Gondooru Taawoota dukke mannu albaanni Yordaanoosi Lagiwa hadhanno gede woyite kakkalaasine soyi. Martanno woyite lagu woˈme daadanni no. Ikkollana kakkalaasine wayi giddora eˈanni heedheenna, wayi lolaha aguri; laguno mooli. Kakkalaano, Israeelete manni baalu waa tayise saˈˈa geeshsha wayi giddo moola baatto aana uurritu. Israeele tenne maalale laˈu yannara, Yihowa Duumu Baari aana loosino maalale qaagginoha dilawannohe?

Yannate gedensaanni, Israeele Hexxote Gobba eˈu. Insa hakko minenna katama miˈna dandiitanno. Gate loosiˈra, woyinenna laalo kayisiˈrano dandiitanno. Hatti adonna malawu lolahanno gobbaati.