ሙሴ ንህዝቢ እስራኤል ንብዙሕ ዓመታት ድሕሪ ምምራሑ፡ ዚሞተሉ ግዜ ቐረበ። የሆዋ ድማ፡ ‘ንእስራኤላውያን ናብ ምድሪ ተስፋ እተእትዎም ንስኻ ኣይኰንካን። ነታ ምድሪ ግና ከርእየካ እየ’ በሎ። ሽዑ፡ ሙሴ ንየሆዋ፡ ነቶም ህዝቢ ዝኣልዮም ሓድሽ መራሒ ኺመርጽ ሓተቶ። የሆዋ ኸኣ፡ ‘ናብ እያሱ ኺድ እሞ፡ ንሱ ኸም ዚመርሖም ንገሮ’ በሎ።

ሙሴ ድማ ነቶም ህዝቢ፡ ድሕሪ ሓጺር ግዜ ኸም ዚመውት፡ የሆዋ ኸኣ ንእያሱ ናብ ምድሪ ተስፋ ኼእትዎም ከም ዝመረጾ ነገሮም። ሽዑ፡ ሙሴ ንእያሱ፡ ‘ኣይትፍራህ። የሆዋ ኺሕግዘካ እዩ’ በሎ። ድሕሪኡ ነዊሕ ከይጸንሐ፡ ሙሴ ናብ ጫፍ ከረን ኔቦ ደየበ፣ ኣብኡ ኸኣ የሆዋ ነታ ንኣብርሃምን ንይስሃቅን ንያእቆብን ዘተስፈዎም ምድሪ ኣርኣዮ። ሙሴ ኺመውት ከሎ፡ 120 ዓመት ገይሩ ነበረ።

የሆዋ ንእያሱ፡ ‘ፈለግ ዮርዳኖስ ተሳጊርካ ናብ ከነኣን እቶ። ከምቲ ንሙሴ ዝሓገዝክዎ፡ ንዓኻ እውን ክሕግዘካ እየ። ሕገይ መዓልቲ መዓልቲ ኣንብብ። ኣይትፍራህ። ትባዕ። ኬድካ ዝኣዘዝኩኻ ዅሉ ግበር’ በሎ።

 እያሱ ኸኣ ናብ ከተማ ያሪኮ ኽልተ ሰለይቲ ሰደደ። ኣብ እትቕጽል ዛንታ፡ ብዛዕባኦም ኽንምሃር ኢና። ንሳቶም ድማ ምስ ተመልሱ፡ ናብ ከነኣን ንምእታው ጽቡቕ ግዜ ምዃኑ ሓበሩ። ንጽብሒቱ፡ እያሱ ነቶም ህዝቢ ኻብቲ ዝሰፈሩሉ ኺነቕሉ ነገሮም። ሽዑ፡ ነቶም ታቦት ኪዳን እተሰከሙ ካህናት፡ ቀቅድሚኦም ናብ ፈለግ ዮርዳኖስ ኪኸዱ ሰደዶም። እቲ ፈለግ ድማ ይውሕዝ ነበረ። ኣእጋር እቶም ካህናት ነቲ ማይ ምስ ተንከዮ ግና፡ እቲ ፈለግ ዋሕዙ ደው ኣበለ፡ እቲ ማይ እውን ነጸፈ! እቶም ካህናት ከኣ ናብ ማእከል ባይታ እቲ ፈለግ ከይዶም፡ ብዘሎ ህዝቢ እስራኤል ክሳዕ ዚሳገር ኣብኡ ደው በሉ። እዚ ተኣምር እዝስ ነቶም ህዝቢ፡ ነቲ የሆዋ ኣብ ቀይሕ ባሕሪ ዝገበሮ ነገር ዘዘኻኸሮምዶ ይመስለካ፧

ኣብ መወዳእታ፡ ድሕሪ ነዊሕ ዓመታት፡ እስራኤላውያን ናብ ምድሪ ተስፋ ኣተዉ። ድሕርዚ፡ ኣባይትን ከተማታትን ኪሃንጹ ኸኣሉ። ግራውትን ኣታኽልቲ ወይንን ኣእዋም ፍረታትን እውን ኪህልዎም ከኣለ። እታ ምድሪ፡ ጸባን መዓርን እተውሕዝ ነበረት።